Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1414_1

<begin>
Wij floriis scody ende willem vanden woude scepenen jn hairlem Oirconden
</begin>
<main>
dat voir ons quamen die kercmyester vander prochykerke binnen hairlem vander kercjjk weghen voirscreuen bi wille ende consente den Raden vander stede Ende ghelieden dat die voechde vander susteren husinghe bi sente michiels cappelle totter susteren behoef die dair nu ter tiit jn wonen of hier namels jn wonen sullen weder hem of ghelossent hebben twintich scellinghe hollans payments siairs die de kerck voirscreuen jairliix te renten hadde op dat huys metten erue dat die voechde totter susteren behoef voirscreuen ghecoft hebben jeghens jan Claes tatgens soen legghende ende staende jn die ghierstrate twisken dirc gheriits soen ende jacop uerde bouts soen met sinen euenknye aen die een side huys metten erue dat miester iacop matheus soens plach te wesen aen die ander side after waerts streckende aen der susteren erue voirscreuen Ende uerlieden hem dair of al voldaen ende wel betaelt den lesten penning metten eersten Ende scouden hem dese Renten voirnoemt clairliic ende al quit
</main>
<end>
In Oirconde desen brieue bezeghelt met onsen zeghelen jnt jair ons heeren 1400 ende viertien sdonresdaechs na sente mathiis dach apostel
</end>