Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1415_2

<begin>
Wij wouter buze ende jan gale scepene in hairlem Oirconden
</begin>
<main>
dat voir ons quam Brechte symons weduwe van gheruliet met Coman jan claes zoens hant hoirs zwaghers ende mombers ende gheliede dat sy jn Rechter aelmissen ende puyrliic om goids willen voir hoir ende voir die ghene dair siis voir begheer ghegheuen heeft ende gheeft met desen brieue tot enen vryen eyghen den myesterzen vanden groten beghiin houe binnen hairlem die nu siin of namels wesen sullen sulke jairliixe Renten alze hier na ghescreuen staen an hollans payment ende jn rechten poirtrecht Eerst op goeswiin ians soens huys ende erue legghende ende staende op craeyenhorst twisken vrederic dircs soen ende claes gheriits soen aen die oistzide claes pieter otten soen aen die westzide afterwaerts streckende aen ghiertruyd aernds weduwe een ende twintich scellinghe ende zes penninge siairs Item op claes pieter otten soens huys ende erue dair an twisken willem claes soen aen die westzide goeswiin ians soen voirseit aen die oistzide afterwairts streckende aen ghiertruyden voirnoemt vier ende twintich scellinghe jairliix dese uoirscreuen Renten te betalen tot bamisse Ende heeftze den miesterzen voirseit met hoirs mombers hant voirnoemt gheloeft te waren als men vrye Renten binnen hairlem sculdich is te waren Des zintt voirwairde dat dese meesterzen voirscreuen van desen voirgheroerden renten weder wt reyken sullen jairliix gheliic hier na ghescreuen staet Eerst den cureyt van der beghinenkerc twee scellinghe siairs Item viif scellinge siairs al voir hoir ewighe memory Item den ghemeenen beghinen opten heilighen paesdach te scenken Een stoep wiins als sii ten heilighen sacramente gaen ende zo wes dair dan ouer bliift vanden Renten voirgheroert dat sullen die meesterzen voirseit jairliix omme deylen den susteren ende beghinen die opten voirseiden hof gheharbercht siin ende wesen zullen ende die bede ende aelmisse pleghen te nemen
</main>
<end>
jn Oirconde desen brieue bezeghelt met onsen zeghelen jnt jair ons heeren 1400 ende viiftien op sente symon ende judendach apostelen
</end>