Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1420_1

<begin>
Wij claes van hwysen ende ysebrant van schoten scepenen jn hairlem Oirconden
</begin>
<main>
dat voir ons quam Alijt heynric dircs zoens wedue mit claes heynrics soens hant hoirs soens ende mombars Ende geliede dat sij vercoft heeft tot enen vrien eyghen den zusteren van sinte michiels binnen hairlem Een recht verendeel van enen Camp lants onderdeel leggende jn gemengheder vuere met wouter gheye ende den zusteren voirscreuen Ende is geheten die grote kijfcamp gelegen jn den banne van heemsteden Ende belent hebben mit erue machtelt hughe smyeders erfnaeme an die oistzide die commenduer van sente jan en willem hughe die tymmermants erfname an die westzide Aliit voirseit met horen kinderen an die zuytzide jacop hugenzoon mit sine kinderen ende jan dircs soen vinc an die noirtzide Ende verliede hoir al voldaen ende wel betaelt den lesten penninc ontbreekt mitten eersten Ende heeftet hem mit claes horrs zoens ende mombars hant gelooft te waren als men vry lant ende erue sculdich is te waren binnen den ban dairt jn gelegen is
</main>
<end>
jn oirconde desen brieue bezegelt met onse zegelen Ende om die meerre sekerhede wil so heb jc claes heynric soen als een voecht voirscreuen van mijnre moeder desen brief mede bezegelt met minen zegel hier beneden an gehanghen jnt jaer ons heren 1400 ende twintich op den sesten dach jn maerte
</end>