Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1420_2

<begin>
Wij Jan Jacops zoon ende claes van huessen scepenen In hairlem Oirconden
</begin>
<main>
dat voir ons quamen heer voppe voppen zoen ende heer Jan van schoten priesteren alze Rentmyesters van den huze dat heer hughe goutsmit ende sii nu ter tiit woenlic bezeten hebben staende In sente Jans straet met Jans hant van bakenesse hoirs mombers Ende ghelieden dat sii vercoft hebben tot enen vryen eyghen andries roeper al sulcke renten als dat huys voirgenoemt Jairlics heeft op andries roepers huys ende erue dat hi nu ter tiit woenlic beseten heeft Ende broeder Jans van zaenden Carthuser plaghen te wesen legghende ende staende In claes heddincs straet twisken willem symans zoen die snyder an die een zide claes hillinc an die ander zide Ende verlieden al betaelt den lesten penninc metten eersten Ende hebben ze hem met hoirs mombers hant voirscreuen gheloeft te waren als men vrye renten binnen der vryhede van hairlem sculdich is te waren
</main>
<end>
In Oirconde desen brieue bezeghelt met onsen zeghelen Int Jair ons heeren 1400 ende twintich sdinxdaechs na onser vrouwen dach annuciacio
</end>