Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1442_1

<begin>
Wii lottiin gherijts soen Jan van huessen Jonghe sijmon van adrikem Jonghe gherijt brawe Jan van adrikem ende willem van assendelff scepene In hairlem doen cond allen luden
</begin>
<main>
want gescille twist ende twijdracht geweest is twisken gherijt mairtijn gherijts soens soen an die ene sijde machtelt mairtijn gherijts soens weduwe mit pieter roepers hant hairs broeders ende mombairs an die ander sijde roerende ende toecomende van alle erffnisse ende goeden die mairtijn gherijts soen ende machtelt ziin wiiff te samen ghemeen hadden In mairtijn gherijts soens laetsten liue Twelc sii an beiden siiden te gevoech te sceyden an ons gebleuen siin op ene pene van hondert engelsche nobelen onse segghen dair off te houden ende te voldoen wes wij dair off vut spreken ende seggen souden Soe hebben wij dair omme te gevoech an beiden siiden die saken ouer gesien ende wel verstaen ende na onsen besten verstand ende wetenhede onse seggen dair off eendrachteliken vutgesproken ende geseit ende optie pene voirseit ende die te gaen off sij verbruett worde die ene helfte dair off tot ons lieffs genadichs heren behoeff van hollant ende die ander helfte dair wij segsluden voirseit die wiisen sullen
Inden eersten so is onse segghen dat alle alzulke landen ende goeden als mairtiin gherijts soen ende machtelt ziin wiiff an malcander In wittachtighen hieliic gebrocht hebben na vutwiisinge der hieliicxe voirwairde brieue die dair off ziin dat sij die an beiden siiden hebben ende deylen sullen halffende halff behoudeliic wes lant datter vercoft Is te wijle dat mairtijn gherijts soen ende ziin wiiff mit malcander In wittachtigen hieliic zaten dat sullen sij coelen elcx halff ende halff voirt so wes lant dat weder omme binnen der tijt voirseit ghecoft is dat sullen sij an beiden sijden hebben halff ende halff also die hieliicxe vorwairde brieue In enen poynte begriipt ende Inhout te winne ende te verliese
voirt Is onse seggen eendrachteliic off zii an enigher siide enige lande off goede meer hadden dan die hieliicxe voirwairde brieue begrepen hebben dat sullen sii elce hebben ende behouden na vutwiisinge der hieliicxe voirwairde brieue voirseit
voirt Is onse segghen ende segghen eendrachteliic als vanden goeden die machtelden twe kinderen bewiist ziin Inder weeskindere boec dair wij scepenen besceyt off gesien hebben ende gherijt mairtijns soen eysschende is halff te hebben ende die goeden dair off bij bespreck testament ende vutvaert van machtelden kindere weghen vutgegheuen ende Inden boedel ghecomen siin segghen wij dat dat doot ende te niet wesen sel Ten waer off dair yemant na vytwiisinge der weeskindere boeck yet off sculdich wair dat sij dat halff mit malcander hebben ende behouden sullen
voirt van alzulke sculden In ontfange ende In vutgheuen als zij an beiden sijden op gheboirt ende ontfangen mogen hebben zeder die tijt dat mairtiin gerijts soen starff dair off is onse seggen dat dat sel staen tot sulker sceydinge ende seggen als die sess personen dair sij des an gebleuen siin dair off seggen ende sceyden sullen
voirt is noch onse seggen eendrachteliic als vanden boedel cost die machtelt voirseit eysschende is dat machtelt dair niet off hebben en sel dairJegen seggen wij doet ende te niet te wesen alzulke sculden als gherijt mairtijns soen hoir eysschende is ende men hem ziin vader sculdich was tot denremonde dat siin vader bij sinen leuende liue bij pieter jans soen ziins neuen hant ontfangen heeft ende voirt men alzulke sculden als mairtiin gerijts soen bii sinen leuenden liue oic ontfangen heeft bij gerijt van weruen hant van ziin renten tot viluoerden hiermede vinden wij die partijen an beiden sijden van allen twist twijdracht ende gescille dat sij tot desen dage toe datum des brieffs onderlinge vutstaende gehadt mogen hebben roerende vander erffenisse ende goeden voirseit verliitt vereffent ende verenicht te wesen optie pene voirseit ende wairt dat sij an eniger sijde ergent omme twijden off sceelden dat houden wij an ons tot onser verclaringe tot ses weken toe ende dair en tenden niet
voirt Is noch onse seggen dat machtelt voirseit den voirseiden gheriit mairtijns soen een boedel eet doen sel naden recht vander stede binnen den sess weken voirscreuen alsoe ver als gherijt hoir des niet verdragen en wille alle argelist vutgesceyden ende dese brieue sijn twe alleens
</main>
<end>
In kennisse der wairheit so hebben wij lottiin gherijts soen Jan van huessen ende Jonge sijmon van adrikem scepenen voirseit desen brieff besegelt mit onsen segelen des wii scepenen voirseit al te samen mit lottiin gerijts soen Jan van huessen ende Jonge sijmon van adrickem voirgenoemt ghemeenliic gebruken In deser sake Int Jaer ons heren dusent vierhondert twe ende viertich tsaterdages na sinte aechten dach
</end>