Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1443_1

<begin>
Wij boudiin jan boudiins soens zoen Ende matheus jeliis zoen scepenen jn haerlem Oirconden
</begin>
<main>
dat voir ons quamen gerijt mairtiin gerijts soens zoen aen die ene zyde ende machtelt mairtiin gerijts soen weduwe met pieter roepers hant hairs broeder ende mombairs aen die ander zyde Ende gelyeden an beyden syden dat sij van malcanderen gedeylt gescift ende gesceyden ziin van alle alsulc lant ende erfrenten als hier na in desen brieff gescreuen staet Ende mairtiin gerijts zoen zaliger gedachten met machtelt zinen wiue voirseyt gemeen hadde in sinen laetsten liue
Inden eersten so sel gerijt mairtiins zoen voirnoemt hebben eygentlic ende erflic behouden alle alsulc lant ende erfrenten als hier na gescreuen staet na wtwijsinge die hyelicxe voirwairde die dair off ziin
Item seuen geerslants die gelegen ziin in den ban van wtgeest Ende bruyct nu tertijt claes direk yben zoen voir seuen wilhelmus scilden siairs
Item noch een stucke lants ende leyt an buysers sluyse buten dijck ende bruyct nu ter tijt claes buyser voir seuen daluen wilhelmus scilt siairs Item noch een half weer lants ende leyt inden ban van haerlemmer lye ende bruyct nu ter tijt pieter coster ende eylairt die wagenair ende gelt tot sinen deel sestaluen wilhelmus scilt siairs
Item noch een halue campe lants ende leyt in scrauen sloot ende bruyct nu ter tijt Jacop reymbrants zoen ende gelt tot sinen deel drie wilhelmus scilden siairs
Item noch een [h]alue campelants ende leyt in oude bograuen van achte morgen ende bruyct nu ter tijt willem zuete tot sinen deel vier daluen wilhelmus scilt siairs
Item die helfte van seuen dalue morgen lants ende leyt in die steeck Ende bruyct nu ter tijt Jan bertholomeus zoen voir drie rinse gulden siairs
Item noch die helfte van een weer lants van achte morgen ende hiet dat smale weer ende leyt ter gouder sluyse ende bruyct nu ter tijt jacop beren zoen ende plach te gelden tot sinen deel vier beyerse gul- den siairs
Item noch drie wilhelmus scilden siairs an erfrenten die mairtiin gerijts zoen voirseyt an machtelt sinen wiue voirnoemt gebrocht heeft
Item noch die helfte van twaleff wilhelmus scilden siairs an erfrenten binnen haerlem die machtelt voirseyt an mairtiin hoir man brochte dair pieter roeper die weder helfte off toebehoirt na wtwijsinge die hyelicxe voirwairde die dair off ziin
Item hier jegens so sel machtelt machtelt mairtiin gerijts soens weduwe hebben eygentlic ende erflic behouden na wtwijsinge die hyelicxe voirwairde die dair off ziin
Item een halue campe lants gelegen in rosen priyel also groot ende also cleen als syze an mairtiin gerijts zoen hoeren man voirseyt gebrocht heeft
Item noch een vierendeel van drie campen lants die sij gemeen heeft met comen dircx weduwe ende gelt tot hoeren deel derdaluen gouden nobel siairs ende leyt binnen der vryhede van haerlem
Item noch achte geers lants inden ban van limmen ende bruyct nu ter tijt hein reynouts zoen voir achte wilhelmus scilden siairs
Item noch een acker lants leyt tot akersloot ende bruyct nu ter tijt willem comen claes zoen voir een pieter siairs
Item noch een acker lants jn die geest ende bruyct nu ter tijt gerijt cuper voir een wilhelmus scilt siairs
Item vier geers lants ende leyt inden ban akersloot ende heet sasckersley ende bruyct nu ter tijt garbrant doeuen zoen voir vier wilhelmus scilden siairs
Item noch een stucke lants leyt in den ban van akersloot binnen den dijck ende bruyct nu ter tijt pieter oude claes zoen voir sess wilhelmus scilden siair
Ende hier op scouden sij malc ander an beyden siden voirseyt van desen lande ende erfrenten die hier voirseyt staen met desen brieue clairlic ende all quijt
</main>
<end>
In Oirconde desen brieue besegelt met onsen segelen jnt jair ons heren 1400 drie ende viertich op sinte agnieten dach Ende deser briue siin twe alleens
</end>