Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1445_1

<begin>
Wij pieter Jordens zoen ende Jan claes dierts zoen Scepenen Jn hairlem Oirconden
</begin>
<main>
dat voir ons quamen willem egberts soen au die een Sijde gheertruud andries roepers weduwe ende lijsbett hoir dochter die sy ghewonnen heef bij andries roeper horen man dien god ghenadich sy ende pieter roeper als een voicht van gheertruut voirseit an die ander zijde Ende gheliden au beiden sijden dattet hilicxse voirwairden sijn ende wesen sullen tusschen willem egberts zoen ende lijsbett voirseit eer dat si mit malcanderen vergaderden jn wittachtighen hilijc ende voir die tijt dat sy malcanderen besliepen
jnden eersten soe sint hilicxe voirwaerden dat willem egberts zoen voirseit an lijsbetten voirseit brenghen sal al alsulke goede als hier na ghescreuen staen
Eerst hondert enghelsche nobel die gheleghen sijn an land an husinghe ende ander goede die hij nv ter tijt hebben mach off toebehoirt daer voer hebben gheloeft als borghe dat alle dese goede voirseit alsoe sullen wesen comen pieter ende huyich aernts zoen
voirt soe sint hilicxe voirwaerden dat gheertruut andries roepers weduwe hier Jeghens gheuen sal lijsbett hoirre dochter te medegaue als van hoir vaders erue
Inden eersten tachtich wilhelmus scilde an ghelde die willem ontfanghen sal van meester jan roeper priester die hij willem voirseit gheloeft heeft te betalen mit sijns voichts hant pieter roeper daer die eerste termijn off wesen sal tot sinte jans daghe baptista te midzomer ende die ander termijn tot sinte lucas ewangelista dair naest volghende
Voirt soe sal willem noch hebben en huus mitten erue legghende ende staende bij die cruus poirt mit vier s siaers ende twe d goets gelts die daer op te hurer staen ende heeft belent gheertruut andries roepers weduwe an die oestsijde pieter mit die voet an die westsijde afterwaerts streckende an gheertruut voirseit welken huys mitten erue ghetaxseert Is voir vijftich wilhelmus scilde ende waer dat willem voirseit dese voirnoemde husinghe vercopen woude bynnen een jaer off twe ende dese voirseide husinghe alsoe veel niet gelden en mochte als voirseit staet soe heeft dan meester Jan voirseit met sijns voichts hant willem voirseit gheloeft dat te beteren bij dese voirseide scepenen ende gherijt jans zoen van der meer ende jan vander meer ghebrueders dese voirseide goede heeft meester jan sijn suster bewijst van hoirre vaderliker erue hier mede schelt willem voirseit als een voicht van lijsbett sijnen wijf gheertruut voirseit quijt van alle goede als hoir van hoir vaderliker erue an bestoruen mach wesen
Voirt soe heeft machtelt roeper mit pieter roeper horen broeder ende voichts hant willem voirseit ghelooft te medegaue mit lijsbett voirseit hoir broeders lant In hilicxse voirwairden vier beyyersche gulden siaers op een bogaert die nv ter tijt claes van adrichem In pachte heeft of hondert beyyersche gulden dair voir tot tween terminen te betalen daer die eerste termijn off wesen sal op alreheilighen dach ouer en Jaer naest commende ende die ander termijn daer off sal wesen op alre heylighen dach daer naest volghende
Voirt soe sint hilicxe voirwairden off si te samen kinderen kreghen ende een van hem beiden of liuich worde ende die kinder van hem beiden mede bynnen een Jair dair nae storue soe sullen dan alle dese voirseide goede gaen van daen dat sij ghecomen sijn alle dinc sonder arghelist Ende dese brieff sijn twe alleens
</main>
<end>
In Oirconden desen brieff bezegelt mit onsen zegelen jnt Jaer ons heren 1400 viue ende viertich
</end>