Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1445_2

<begin>
Wij pieter Jordens soen ende Jan claes diedairts soen scepene in hairlem oirconden
</begin>
<main>
dat voir ons quamen pieter van zaenden an die ene ziide ende machtelt jacop hugen soens dochter an die ander siide Ende gelieden an beiden siiden datter hieliicxe voirwairde siin eer sij beide voirseit mit malcander vergaderden in wittachtigen hieliic ende voir die tijt dat sij malcander besliepen
Inden eersten siint hieliicxe voirwairde dat pieter van saenden an machtelden voirnoemt brengen sel in wittachtigen hieliic dese na [be]escreuen goede
eerst die helfte van een huys mitter helfte vanden erue onderdeel legggende ende staende Inden ban vander wiic opter zee besijden wouter pouwels soens husinge mitten erue die nv ter tijt woeliic beseten heeft willem philipps soen
Item een huys mitten erue leggende ende staende Inden seluen ban alse meer ende alse cleyne alst pieter voirseit die voirtijts gecoft heeft jegens jan jans soen
Item drie wilhelmus scilde siaers erffliike renten legghende tot douendrecht in claes smits zate na jnhout sbrieffs die dair off is
Item een engelsche nobel siaers geleghen jnden ban van scoirle sprekende op stapelrijers soens goet na jnhout sbrieffs die hij dair off heeft Ende dair toe die helfte van alle ymboedel tilhaue facelment ziluerwerck hoet genoemt mach wesen dair siin kindere die hij gewonnen heeft bij wijnen dirc jan claes florijs soens dochter zinen wiue zaliger gedachten die weder helfte vanden seluen ymboedel tilhaue facelment ziluerwerc onderdeel off toe behoren hier jeghens sel machtelt jacop hughen soens dochter voirseit In brenghen an pieter van zaenden voirnoemt jn wittachtigen hieliic Dese na bescreuen goeden
Eerst achte wilhelmus scilde siaers gelegen jnden ban van akersloot ende brwct op dese tijt claes vaseraden soen
Item sess wilhelmus scilde siaers gelegen Inden seluen ban ende brwct op dese tijt besorger
Item zeuen wilhelmus scilde siaers gelegen bij hairlem Int rosen preyeel
Item drie wilhelmus scilde siaers an erfflike renten op huyse ende erue binnen hairlem
Item die helfte van die grote boomgaert mitten erue dair pieter roeper hoir broeder die weder helfte onderdeel off toe behoirt geleghen buten der crwspoirte ende nv ter tijt is binnen der vriheden van hairlem
Item die helfte vander husinge mitter helfte vanden erue onderdeel dair pieter roeper hoir broeder ende sij nv ter tijt te samen in wonen legghende ende staende jn sinte jans stege Ende dair toe alle ymboedel tilhaue facelment siluerwerc hoet ghenoemt mach wesen also groot ende alse cleyne als sij die nv heeft met voirwaerden dat pieter van zaenden dese voirgenoemden goeden die sij an hem brenct in wittachtigen hieliic vercopen versetten noch in geenrewijs vervreemden en sel buten wil consent ende goetduncken van pieter Jordens soen van claes diedairt eendrachteliic ende bij hoir seluen Ende so wes goeden dat machtelt voirseit meer heeft off hebben mach dan hier voir benoemt staen dair sel sij horen vrien wille mede doen sonder enich wederr seggen van pieter van saenden off yemant van siine wegen
Voirt siin hieliicxe voirwairde alze waert dat pieter van zaenden voirseit storue ende offliuich worde voir machtelden voirnoemt sonder bliuende blikende boirte bij hoir gewonnen na hem te laten so soude machtelt voirgenoemt off staen ende eyghentlic behouden alle alzulke goeden als sij an hem gebrocht hadde off sij mach ten haluen goede gaen off sij wille jeghens pieter van saendens erffnamen ende die koer sel an machtelden staen
Voirt siint hieliicxe voirwairde alze waert dat machtelt jacop hughen soens dochter voirseit storue ende offliuich worde voir pieter van saenden sonder bliuende blikende boirte bij malcander gewonnen na hoir te laten so soude pieter van zaenden voirseit op ende neder nemen ende deylen alle goeden halff also groot ende alse cleyne alse machtelt voirnoemt ende pieter van saenden die te samen gemeen hadden in machtelden ziins wiiffs laetsten liue het sij in brieuen off buten brieuen
Voirt so heeft pieter van saenden voir ons geloeft in hielicxe voir- wairden alze waert dat hem hier na tot eniger tijt enige heerlike goeden an bestoruen bij hoir beider leuenden liue dat hij machtelden sinen wiue dair an verliifftochten sel ende hoir dairin also besorgen ende bewaren alst van rechts wegen behoirt bij jan dirc tymans soens soen bij pieter Jordens soen ende bij claes diedairt hoir neuen alle ding sonder argelist ende deser brieue ziin twee alleens
</main>
<end>
In oirconde desen brieue bezegelt mit onsen segelen hier beneden an gehangen jnt jaer ons heren dusent vierhondert viue ende viertich op sinte agnieten dach
</end>