Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1448_1

<begin>
Wij Symon van noirtich ende geriit vander meer scepene in hairlem Oirconden
</begin>
<main>
dat voir ons quam gheertruud pieter jans soens weduwe mit symon pieters soens hant hairs mombairs Ende geliede dat sij puerlic omme goids willen ende in Rechter aelmissen voir hoir ende voir die gene dair sijs voir begeert gegeuen heeft ende geeft mit desen brieue tot enen vrien eighen den rechten armen brootgangers die voir der luyden doeren omme broot gaen binnen hairlem zesse maden lants een weinich meer gelegen jnden ban van vutgeest jn een sticke lants van dertiendalue maden onderdeel gemeen mit jan amelgairs zoen ende is geheten claes pieters soens campe dair geertruden aendeel tot deser tijt te huyer gelt elue wilhelmus scilde siaers ende belent hebben mit eigen ende mit erue an die noirdsijde jan amelgairs soen ende an die westsijde claes amelghairs soen Ende gheertruud mit hairs mombairs bant voirscreuen heeft den rechten armen binnen harlem dat lant voirsseit gelooft te waren als men vrij lant ende erue jnden ban voirscreuen sculdich is te waren hier op is voir ons gecomen bairtraet dirx dochter my nistersse vanden convent vander elue duysent mageden binnen hairlem optie after crofte mit claes hant van Ruuen hairs mombairs ende heeft vandes convents wegen voir hoir ende voir horen nacomelingen mynistersse ende conventualen susteren den seluen huse gelooft ende an genomen ter begeerten van gheertruden voirnoemt dat sij die huier vanden lande totter armen behoeff voirseit jairlicx heffen ende op boeren sel ende die sess maden lants een weynich meer vander armen wegen voirgeroert verhuyeren ende dat den rechten armen voir hair convents doer voirt deylen ende geuen sel van weec te weec ende van dage te dage als men rechte aelmissen sculdich is te deylen ende te geuen het si an brode off an gelde also ver als die huyer voirscreuen strect sonder enige versumenisse off arglist dair jn te soecken off te laten geschien in enigerwijs durende tot ewigen dagen Ende wairt dat sij des niet en deden hoe wel sijt gelooft ende angenomen heeft te doen als voirscreuen is ende enich gebreck dair jn geuiele dat gheertruud voirseyt ymer opten zusteren voirnoemt niet toe en getrouwet so soude die sess maden lants voirscreuen een weynich meer dan eygentliic ende erffliic comen ende hebben den heyligen geest ende tgasthuys binnen hairlem tot enen vrien eigen totter armen behoef voirseit met voirwairden dat die heylige geestmeesters ende gasthuysmeesters binnen hairlem dan jnder tijt wesende dat selue gelt ende huyer dat jair- licx vanden voirscreuen lande comen sel geuen ende deylen sullen als voirscreuen is sonder enige argelist dair jn te zoecken ymmer gheertruden voirgenoemde wille ende aelmissen voirtganc te hebben durende tot ewigen daghen ende altijt dit voirscreuen lant onvercoft ende onvervremedt te bliuen sonder enige forpelie off argelist dair jn te zoecken off te doen soecken in enigerwijs hier waren bij an ende ouer alze lende ende tuge Jan amelgairs soen ende claes amelgairs soen Deser brieue siin twe alleens
</main>
<end>
Jn oirconde desen brieue besegelt mit onsen segelen Ende omme die meerre sekerhede wille soe heb ie geertruud pieter jans soens weduwe voirseit gebeden aernt claes soen scout van vutgeest desen brieff mitten scepenen voirgenoemt voir my ende ouer my te besegelen dat ic aernt claes soen scout voirscreuen omme bede willen van geertruyden voirseit gedaen hebbe ende des te oirconde mijn segel an desen brieff mitten scepenen voirnoemt mede gehangen jnt Jaer ons heren duysent vierhondert acht ende viertich op sinte katrinen dach
</end>