Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1460_1

<begin>
Wij scout burghermeystere scepene ende rade der stede van Hairlem doen condt allen luyden dat wij omme mynne ende lieffte die wij dragen tot onzen lieven ende wael gemynden den jonghen scutteren van den Voetboghe bynnen der stede van Hairlem voirscreven ende omme dat die scutterye van denzelven jonghen scutteren dies te bet in eren ende waelvairt geregiert ende onderhouden ende oick die voirscreven stede in toecommenden tijden van denzelven scutteren wel ende eerlicken gedient moghe worden als des van node wesen zal gegonnen ende gegeven hebben gonnen ende geven mit desen tegenwoirdygen brieve denzelven jonghe scutteren voirnoemt zulke privilegien ende vrijheden als hier na gescreven staen
</begin>
<main>
1. In den eersten hebben wij hunluyden gegonnen ende gegeven dat voirtan nyemende wye hij zij van nyeuwes gezet gecoren noch genomen en zal worden in die oude scutterye van den Voetboge bynnen Hairlem voirscreven anders dan uut die jonge scutterie voirgenoemt ende hij en zal eerst wesen ende ten mynsten twee jaren lang afftereen geweest hebben in de jonge scutterye voirscreven
2. Voirt zo hebben wij hunluyden gegonnen dat zo wye voirtan die deken ende vinders van der jonge scutterye bij goetduncken van den scout ende van den gerechte van Hairlem in der tijt wesende ordinieren ende verkiesen te wesen in die jonghe scutterye voirscreven ende hun die wete dair off gedaen worde bij der stede bode die zal dan terstond dair inne weesen ende blijven zonder enich wederzeggen Ende wairt zake datter yement wair die hier inne wederspannych off overhorich wair ende niet in de jonghe scutterye voirscreven wesen en woude als hun die wete dair off gedaen worde gelijc voirscreven staet die zal men terstond bij der stede bode gebieden in te leggen ende hij zal inleggen ter tijt toe dat hij willichliken in die jonge scutterie voirscreven wesen wille ende ghinghe hij anders dair en boven uut ende hij dair off begaen worde alze recht is hij zoude verbueren zulke boete als der stede kuer begrepen heefft
3. Ende des zo zullen voirtan die deken ende vinders van die oude scutterye bynnen Hairlem bij goeduncken van den scout ende gerechte voirscreven elkes jairs kiesen ende nemen uut den jonghe scutteren voirscreven diegene die hun gebreken in die oude scutterye voirscreven zo dat zijs niet en zullen laten verjaren noch over laten staen langer dan van jare te jare op dat die jonghe scuttery voirseit niet te veel bequamer gezellen teffens verliezen en zullen behoudelicken dat men voirtan geen deken noch vinders van de jonge scutterye nemen en zal in die oude scutterye alzo langhe als zij deken off vinders zijn
</main>
<end>
Ende om dat wij ymmer willen dat alle dese privilegien ende vrijheden voirscreven den voirscreven jonghe scutteren volcommelicken gehouden worden van ons ende van onzen nacommelingen tot ewygen dagen zonder verbreken so hebben wij des toirkonde desen brieff doen bezegelen mit onzer stede zegele van zaken twelke wij bij gebreke van onzer stede groten zegele alhier in dezer zake gehouden willen hebben van zulken wairde ende macht als onzer stede grote zegele voirscreven Ende omme der meerre vesticheit wille soe hebben wij Geryt van Adrichen Garbrant Claes Pellygrims zoens zoon Claes Lieve ende Allyn Claes zoon op dese tijt scepene in Hairlem desen telven brieff mede bezegelt elex mit onzen zegelen hier ingehangen int jair ons heren duysent vier hondert neghen ende vijfftich opten thienden diep in Februario
</end>