Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1460_2

<begin>
Int jaer ons heren dusent vier hondert ende tsestich soe hebben die scout mitten gherechte van Haerlem vernuwet ende gheconsenteert den luden van der snijder neringhe binnen Haerlem sulke ordinancie ende punten als hier nae ghescreven staen ende ghebieden enen ygheliken die se cleven die alsoe te houden op sulke boeten als hier nae volghen ende die te gaen als si verbuert worden een derdendeel daer of tot ons liefs ghenadichs heren behoef van Burgonghen een derdendeel totter snijders outaers behoef een derdendeel tottes gherechte behoef van Haerlem
</begin>
<main>
1. Item in den eersten soe en sal niement binnen Haerlem snijden noch tafel houden hi en sal eerst poerter tot Haerlem wesen ende sijn proeve ghedaen hebben ghelic dat costumelic is bi goeden mannen van den ambochte voerscreven die jaerlicx bi den gherechte daer toe ghescict sullen worden om te weten weder hi bequaem is der luden laken te breken of niet Ende als hi sijn proeve te rechte ghedaen heeft soe sel hi eerst gheven totter snijders outaer behoef viertich schellinghen heren ghelts voer der tijt dat hi snijden of tafel houden sal Ende dit is te weten ende te verstaen van denghenen die binnen der stede van Haerlem gheboren sijn
2. Item soe wanneer een gast poerter gheworden en hi sijn proeve ghedaen heeft ghelic voerscreven staet soe sel hi eerst gheven totter snijders outaer behoef ses ponden heren ghelts voer der tijt dat hi sniden of tafel houden sal op die boeten van drie ponden heren ghelts also dicke als hi daer over dede te gaen an drien ghelick voerscreven staet
3. Item soe en sal gheen poerter of gast binnen Haerlem in enighen heymeliken steden sniden noch naeyen 1 ende soe wie daerof inbruekich gevonden of mitten wercke dat hi ghemaect hadde binnen sjaers daer of betuycht worde mit twee poerteren van Haerlem of meer die soude verbueren die boete van drie ponden heren ghelts die te gaen in drien ghelijc voerscreven staet Noch gheen ghildebroer en sal naeyen anders dan op sijn tafel op dieselve boete Behoudelicke dat een yghelike sijns selves wercke dat tot sinen live tot sijns wijfs sijnre kinderen of broedighe huusghesinne behoirde of waer yemant die enighe goede man of vrouwe binnen horen huuse diende ende hoer brodighe huusghesin waer die mach dier ende alle sine brodighe huusghesin wel sniden ende naeyen dat tot horen live behoert sonder verbueren
4. Item waer enich meyster die een knecht hielde wercken of op sine tafel enich werck dede dat dien meyster niet toe en behoerde die meyster soude verbueren die boeten van drien ponden alsoe verde als hi daer of bruekich bevonden of mitten wercke dat die knecht ghemaect hadde binnen sjaers betuycht worde mit twee poerteren van Haerlem of meer
5. Item soe en sal gheen snijer binnen Haerlem annemen enich kint dat een gast is dat kint en sal eerst gheven tottes outaers behoef thien schellinghen ten waer dattet kint broetganck waer op die boete ende te verhalen an den meyster ghelic als voerscreven staet
6. Item so en sal gheen snijer binnen Haerlem enich poerters kint annemen te leren dat kint en sal eerst gheven tot des outers behoef voerscreven vijf scellinghen heren ghelts ten waer dattet soe arm waer dattet sijn broet bidden most op die boete voerscreven sal men verhalen an den meyster
#...#
</main>
<end>
</end>