Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1463_1

<begin>
Int jair ons heren MCCCC drie ende tzestich opten vierden dach in Meye gekuert bij scout scepenen ende rade der stede van Haerlem ende bij goetduncken van der meester menichte dergeenre die in den rechte geweest hebben
</begin>
<main>
1. Alze dat voirtan die scepenen bynnen Haerlem uuyten zullen bynnen hoirre tijt alle gestede vonnissen dair off die dinctalen bynnen hoirre tijt bedinct ende in tscepenenboeck gescreven zijn off die hem van den ouden scepenen in tscepenenboeck gescreven overgelevert zijn uuytgenomen tgeen dat bynnen vierthien dagen voir dat zij offgaen bedinct is optie boete van twintich pont tot sheren behoeff ende viertich duysent stiens totter stede behoeff te verbuyren elc scepene die zijn stemme totten sloote van den vonnisse voirgescreven niet gedaen en zal hebben
2. Item dat nyemant zal mogen houden yemande mit zijne goeden sitten in bescudde dwelke goeden voirgescreven den anclager mit brieve van sculde verstaen zijn off diegene die jonger brieve hebben sprekende opten sculdenair ende op zijnen goeden zullen den rechter mogen andingen dat hij van sheren wegen sculdich wezen zal des sculdenairs goeden te vercopen ende van den outsten brieven eerst in te betalen alzo verre als des sculdenairs goeden strecken zullen
3. Item dat zo wye na den recht van der stede in den eygendom ende in den besitte van yemants goeden gewijst is die zal dair inne wezen ende bliven zonder vorder inleydinge dair op geschien ende waert dat die sculdenair dair en boven in den goeden voirgescreven bleve zitten zo zal die anclager den rechter mogen andingen dat hij van sheren wegen die geweldige hant van den goeden voirgenoemt doen zal eer hij yemant recht doet
4. Item dat alle der stede dienres hoire diensten ende slotelen nederleggen zullen alzo vroech als die twe ende twintich personen op Sinte Jorys dach martelair gekoeren zijn ende die dienste niet weder anvairden ten zij bij wille ende consente van den nuwen burgermeysteren
</main>
<end>
</end>