Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1476_1

<begin>
Wij wouter van bekesteyn Ende Jan van schoten Scepenen In hairlem oirconden
</begin>
<main>
dat vor ons quam hillegondt vliegers dochter ysebrant Rietcoopers wedewe mit Theeus geerijts zoons hant hairs gecoren voichts voir recht Ende opgaf tot eenen vryen eygen den gasthuusmeesters van sinte elizabetthen gasthuuse staende binnen der stede van hairlem voorseyt tot des voorscreuen gasthuus behouf die helfte van den huyse mitter helfte vanden erue onderdeel Ende dair toe die bruyckwair vander ander helfte van den huyse mitter helfte van den erue voorscreuen alsoe lange als die zelue hillegondt leuen zal ende niet langer liggende ende staende optie spairne tusschen Jan Reyers zoon an deen zijde pellegriim floris zoon an dander zijde afterwairts streckende an pellegriim floris zoon voorseyt Ende verliede hoir dairaf al voldaen ende wel betaelt den lesten penninck mitten eersten Ende heeftet mit hairs voichts handt voorseyt den gasthuusmeesters voornoemt tot des voorscreuens gasthuys behouf geloeft te waren alsmen vry huys ende erue totter helfte toe ende mitter bruyckwair vander ander helfte vanden zeluen huyse mitten erue alsoe lange als die voorseyde hillegondt leuen zal ende niet langer binnen der vryhede van hairlem sculdich is te waren mit thien scellingen goets gelts siaers die op dat heele huys mitten erue voorscreuen staen alsoe lange als die zelue hillegondt leuen zal ende niet langer
</main>
<end>
jn oirconde desen brieue bezeghelt mit onzen zegelen jnt jair ons heeren duysent vierehondert zesse ende tzeuentich opten zesthienden dach in decembri
</end>