Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1483_1

<begin>
Gekuert bi schout burgermeesteren scepenen ende rade der stede van Haerlem omme de onderhoudenisse van der backerijneringe tot meesten oerbaer ende profijt van de inwonende ende ghehele ghemeente van dien de punten ende articlen hier na volghende
</begin>
<main>
1. In den eersten dat van nu voertan nyemant bynnen deser stede ende vrijheit backer noch sliter van broot wesen en sal die voer dese tijt ende tot noch toe dats totten vijfthienden dach in Decembry anno XIIIIc drientachtich niet gebacken en heeft ten si dat hi der backer ghilde wynne dat elck wynnen sal moghen mits tsinen ingange te geven vier Rinsgulden ten ware een backers kint die salt mogen wynnen mit drie Rinsgulden tot XL grote Vlaems tstick gherekent Welken ingang gaen sal te weten een derdendeel tot mijns ghenadichs heren behoef sgraven van Hollant een derdendeel tottes gerechts behouff ende een derdendeel tottes backers outaers behouff Ende waert dat yemant hem vervorderde broot om gelt te backen sonder tvoerscreven ghilde in manieren voergescreven eerst gewonnen te hebben dat ware soe dick ende menichwarven als bi den geswoern van den backers die in der tijt sijn bevonden worde optie boete ende verbuernisse van drie ponden heren gelts te gaen in drien als voerscreven is
2. Item zoe sullen alle harbergierers die binnen deser stede ende vrijheit self oven geset hebben ende backen gehouden wesen tghilde in manieren voergescreven te winnen ende alle haer broot dat si backen leveren oft vercopen stellen ende scicken na der ordinancie ende kueren die hier na volgen ende bescreven sijn
3. Item alle dieghene die tghilde in manieren voergecreven ghewonnen sullen hebben ende backers sijn sullen alle jare als men der backer ghilde ett selver persoenlick comen eten oft enen in haer stede senden sonder vandaer te bliven ofte op misgelt te sitten oft anders sullen geven hoir volle gelt dat men elken ghildebroeder in tselve eten gherekent heeft optie verbuernisse van twintich scellingen heren gelts te gaen an drien als voirscreven is
4. Item soe wanneer bi ommeloop ende bi den vier gheswoern of tmeerdeel van dien coern binnen deser stede ghecoft wordt tsij tarwe oft rogge dairof ende van dien coop sal gaen ten voerscreven outaers behouff van elck hoet twe groten Vlaems dat geven ende betalen sal dieghene die vercoper is ende dat in handen van den geswoern voirgescreven van welken coop indien se op dagen gesciet twe uytsneden eedulen gemaect sullen worden enen voir den vercoper omme sijn penningen op sijn dagen ende terminen tontfaen dander voir de voirscreven geswoern omme deselve geswoern daer mede te gaen mit haren knecht totten ghemene backers die van dien coern gecoft sullen hebben ende eiken scarpelick te vragen ende dairof de verlijnge te nemen van tgeen ende hoeveel hi gecoft heeft omme ymmer den voirscreven vercoper van sine besculde penningen op sijn dagen ende termijnen versekert te wesen soe als men elcx verlijnge teykenen sal in de voirscreven uytsneden eedel Ende soe wie dan van tselve coern dat hi bi de geswoern gecoft oft verleden hadde sine coopman op sine dage ende terminc niet en voldede noch en betaelde dat waer after denselven dach ende termijn optie verbuernisse van sinen neringe want hi van dien dach voirt niet en soude moeten backen noch oick geenrehande neringe doen bynnen deser stede oft vrijheit aleer ende voir de tijt dat hi sine coopman duechtlic voldaen ende wel betaelt sal hebben
#...#
</main>
<end>
</end>