Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1486_1

<begin>
1. Opten XXen dach in Appril anno sess ende tachtich gekuert bij schout burgermeesteren scepenen rade ende bij goetduncken van der meester menichte derguenre die in den gerechte geweest hebben
</begin>
<main>
dat zoe wye buyten der prochykercke in enige andere kercken ofte panden binnen deser stede begraven wordde ende die administracie van haeren sacramenten van den vicecureit ofte cappellanen van der prochykercke gehadt ende ontfangen hebben dat hore erfgenamen geven ende betalen zullen totter fabryck ende tymmeringe van onse moeder die heilige kercke voorscreven zulke rechten ende costumen als derzelver fabryck ende tymmeringe toebehoirt ende men aldair gewoenlicken is te geven van den lijcken ofte dooden in derzelver kercke begraven het zij van clockluydingen van graven te openen van borstkeersen ende anders na costume ende gewoente van dien niet dair af uuytgesondert Ende alsoe als die costers van der vorscreven prochykercke die in der tijt bij derselven gestelt ende geordineert wordden bij dage ende bij nachte den gemeenen ondersaten van der voorscreven prochykercke dienen moeten ende altijt alst van noode is reede wesen om dat wairdige heilige sacrament te verlichten zoe dat zij dick ende menichwarven bij ontijde ende onweder bij der straten moeten zijn als anderen rusten mogen dair niet zekers van loon toe en staet ende dair af dat zij oick dickwil niet bedocht en wordden dat tegens die gemeene regule is dat arbeit loons wairdich is dat dairomme oick die erfgenamen van denguenen die hoer uterste sacramenten uuyt onse moeder die heilige kercke hebben zullen het zij dat zij dair binnen begraven wordden dan elders in enige cloosteren ofte panden geven zullen den voornoemden costers van elck lijck ofte doode alsoe begraven ende die verlicht worde met derthien keerssen vier ende twintich stuvers ende die alleen mit vier stalkeerssen verlicht wordt off dair onder twaelf stuvers dat zij hebben ende genyeten zouden indien diezelve lijken ofte dooden in der voorscreven prochykercke begraven wordden
2. Gekuert als voren dat voirtan nyemant wye hij zij tot geenen plaetsen an deser stede muyren geenrehande huysen loedsen noch ander getymmert en tymmere noch en doe tymmeren ofte maken optie correcty van der stede want overdragen ende gesloten is om die reparacie van den voorscreven muyren die huysen ende loedsen die voir desen tijt dair an gemaict ende getymmert sijn af te kueren
</main>
<end>
</end>