Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1493_1

<begin>
Ofgelesen upten XXVIIIen dach in Augusto anno XIIIIcXCIII presentibus Lourys Huysman stedehouder van den schout Jan van Foreest Claes Pieterszoon Hals ende Willem van Adrichem burgermeesteren Adam Gerytszoon ende Ysbrant van Spaerwoude scepenen
</begin>
<main>
Alsoe als enige van den poerteren ende inwonende van deser stede van Haerlem alsoe wel weeskinderen als anderen hun selven absenteren ende houden uuyter selve stede om alsoe tontgane van enige betalinge te doene van hueren gesetten penningen daer up dat zij in den lasten van der voerscreven stede geset zijn te gelden twelke wel gescepen waere meer te gebueren ende van meer anderen poerteren ende inwonende geplogen te worden indien daer inne niet voersien en worde Soe is omme daer inne te voersiene bij den schout burgermeesteren scepenen ende der meester menichte van der vroescap ende gezworen raide derselver stede gekuert dat men voertan alle die goeden die men binnen der vrijhede van Haerlem bevynden sal het zij huysen mit horen erven pachten ende anders alle goeden geen uuytgesondert den poerteren ende inwonende toebehoorende die hun uuyter stede voerscreven houdende zijn of die noch uuyter selve stede trecken ende hun selven daer uuyt souden willen houden openbaerlicken van derselver stede wegen veylen ende uuytroepen sal up zekere beteykende dagen te vercopen omme alsoe betalinge van hueren gesetten penningen te mogen gecrigen ende dieselve gesette penningen bij zulken wegen uuyt horen goeden te maken Wel verstaende dat diegeene van den poerteren ende inwonende denwelken die voerscreven goeden die alsoe vercoft zullen worden toebehoeren vierthien dagen lanck dach hebben sullen na den dach van der voerscreven vercopynge om dieselve hore goeden weder te vrijen ende te lossen mits hore voerscreven gesette penningen upleggende ende betalende ende mit twee stuvers van elken Rijns gulden van alsoe vele als die vdvoerscreven goeden vercoft sullen zijn den eenen stuver te gaen totter stede behoef ende den anderen totten coepers behoef Ende soe wye sulkerhande vercofte goeden binnen den eersten vierthien daghen na dat se vercoft sullen wesen niet en vrijhede noch en lossede in der manieren als voerscreven staet die en sal na dien dach geen lossinge meer daer an hebben mer die burgermeesteren ende tresoriers sullen dan van derselver stede wegen den coepers geven ende verlyen scepenebrieve van Haerlem ende oick waernisse doen van tgeen dat zij gecoft sullen hebben als dat na den rechten van der stede behoren sal
</main>
<end>
Gesloten ende gekuert upten IXen dach in Julyo anno XIIIIcXCIII voerscreven
</end>