Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1496_1

<begin>
Ofgelesen upten XXIIen dach in Aprille anno XIIIcXCVI presentibus 1 Gekuert bij schout burgermeesteren scepenen ende rade der stede van Haerlem ende der meester menichte van denguenen die in den gerechte geweest zijn
</begin>
<main>
als dat voertan nyemant wye hij zij enigen zusterhuysen begijnhoven ofte cloosteren van mannen ofte vrouwen staende binnen deser stede en sal mogen updragen quijt scelden vercoepen ofte oeck in testamente maken of anderssins hoe dattet zij vervreemden in eniger manieren enige huysen ofte erven gelegen ofte gestaen binnen deser voirscreven stede van Haerlem ende dat optie verbuernisse van denselven huysingen ende erven ende daer toe optie boeten van tzestich pont heren gelts alsoe dicke als yemant dat dede dieselve boeten te gaen tdeen helft tot tsheren behouf ende tdander helft totter stede behouf Ende dat voertan nyemant van den scepenen in Haerlem in der tijt wesende enige brieven en sal mogen bezegelen noch oick nyemant van den gezworen clercken enige brieven en sal mogen scrijven daermede dat enigen zusterhuysen beghijnhoven ofte cloosteren van mannen ofte vrouwen enige huysingen ofte erven binnen dese voerscreven stede van Haerlem opgedragen quijtgeschouden vercoft gegeven oft anders in testamente besproken worden ende dat optie boeten van thien ponde heren gelts te verbueren bij elken scepen ende oick bij eleken clerck van elcken brief die zij daerof bezegelen ende scrijven sullen die voerscreven boeten oick te gaen tdeen helft tot tsheren behouf ende tdander helft totter stede behouf Des zoe en sal nyemant enige scepenenbrieven van huysingen ofte erven staende binnen der vrijhede van Haerlem mogen scrijven anders dan die clercken van den clerckambochte binnen Haerlem ende dat op gelijcke boeten van thien pont te verbueren alsoe dicke als yemant anders dat dede dieselve boeten te gaen in tween als voerscreven is Welverstaende dat hier inne uutgesondert is dat clooster van den Augustijnen staende binnen dese voerscreven stede dat cortelinge begonnen ende noch nergent na voltymmert en is denwelken men gonnen ende consenteren sal een redelijke plaetse van huysingen noch te mogen hebben ende coepen als zijt vermogen om die te betymmeren ende voerder nyet
</main>
<end>
</end>