Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1513_1

<begin>
</begin>
<main>
Dese twee navolgende kueren zijn gesloten ende ofgelesen upten XIen dach in Meye anno XVcXIII presentibus Dierick van Bekesteyn Willem van Loo Gheryt Adamszoon ende Gheryt van Warmondt burgermeesteren ende alle de scepenen preter Martin Claeszoon
</begin>
<main>
1. Gekuert bij den schout burgertnecsteren scepenen raidt ende bij goetduncken ende gemeen overeendragen van der meester menichte die in den gerechte geweest hebben dat voortan alle dieghene die dese stede van Hairlem eenich gelt van excijsen ofte andere stedegoeden sculdich sijn off noch namaels sculdich sullen worden ende die men daeromme voer recht anspreect verbueren sullen elex drie croonen tot acht ende veertich grooten Vlaems tstuck een derdendeel dairaff tot sheeren behoeff een derdendeel totter stede behoeff ende een derdendeel dairoff tot den excijsbewairders behoeff Ende off degeene die alsoe voer recht angesproken ende verwonnen wort dwersnachts dair nae nyet en betaelde soe sal die schout ten huyse van den gebrekigen mogen gaen ende nemen dair uuten huyse tweevout soe veel an pande als de sculde draecht mitgaders oick de boete van den drie croonen ende daer en boven twintich stuvers voor sijnen ganck
2. Eodem die gekuert bij den schout burgermeesteren scepenen raidt ende bij goetduncken van der meester menichte die in den gerechte geweest hebben als vooren dat nyemandt wye hij sij eenige olyemolens binnen deser stede stellen setten off fonderen en zal noch doen stellen setten off fonderen dan binnen twintich roeden an de muyeren ende vesten van deser stede ende nyet vorder inwaerts uptie boeten van XXXVI ponden heeren gelts te gaen deen helft tot sheeren behoeff ende dander helft ter stede bchoeff soe dicke als yemandt begaen werde ter contrarie van dien gedaen te hebben
</main>
<end>
</end>