Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1513_2

<begin>
</begin>
<main>
Ofgelesen upten XIIIIden in Decembry XVcXIII presentibus de scout Bekesteyn Adaems burgermeesteren Paenderen de Vriese Montfoirt scepenen Omme te maicken een grove drapery ende tot verheffinge van der stede neringe proffijt ende welvaert derzelver soe hebben de heere ende gerecht bij gemeen overeendragen van rijcdoem ende vroescap bij hunluyden geroupen zekere ende dyversche personen hun uptie draperye verstaende geordonneert ende geconcipiert
1. Dat men zal mogen halen ende indoen tot behouf van derzelver grover draperye Spaensse Casteelsche wolle Scotse wolle oft anders ende oick Scotse vachten off refuys commende van Calis ende de lakenen die men van de voorscreven wolle maicken sal zullen genoemt wesen cantsoen ende men sal se sceren in een kamme gelijck men nu de aerdewollen 1 uuyt de voirwollen comende sceert van LXVIII gangen of anders als men daer up ordonneren sal
2. Item men sal dese lakenen verwen an de lakenen mit alrehande verwe te weten zwart blaeu roet paers groen monteseliers tyeren ende anders ende vercopen bij packen ende bij tyeren ende de verwen sal men de 2 basten
3. Item zoe wie dese lakenen sal willen maicken en sal geen voirwollen lakenen mogen maicken ende wye oock voirwollen maict of maicken sal willen en sal van dese wolle in zijn huys niet moeten commen upte boete van tsestich pont heren gelts ende de correxcie van der stede
4. Item van gelijcken en sal geen kemster spinster ofte wever tweerehande wolle of gaern in zijn huys mogen hebben upte boete van thien pont heren gelts ende de correxcie van der stede
5. Item zoe wye van buyten innecommen sal willen omme dese neringe te doen zullen vrij incommen ende den heere ende gerecht geven die poirterscap ende tambacht zoe verre alst hunluyden angaet het zij trapenyerder verwer wever volder etc Ende zoe wye eenige wollentouwen van buyten in wil brengen ofte volder die volconmmen ende meestrye setten wille dien sal men tot voirdeel van dien geven een pont groten ende dat betalen nae dat se een half jaer haer neringe gedaen zullen hebben
6. Item zoe wye eenige volle ofte vachten tot dese draperye zal willen inbrengen zal se vrij mogen inbrengen ende wederomme uuytvoeren tot zijnen appetyte zonder eenige oncosten te betalen indien hij die hier nyet vercopen en mach behoudelick dat de waerdeyns ofte deghene die daer toe geordineert zullen worden daer kennisse of hebben zullen Ende de wolle die hier binnen blijven sal getrapeniert te worden daervan zullen die waerdeyns kennisse nemen ende voir haer besien ende uuytwerpen ende hebben voir haer salarys van elek hondert een halve stuver ende wye anders dede of doet waer upte boete die in twaerdeynsbouck daer of gescreven staen alle de boeten te gaen an drien een derdendeel tot sheren behouf een derdendeel totter stede behouf ende een derdendeel totten waerdeyns behouf
</main>
<end>
</end>