Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1514_1

<begin>
</begin>
<main>
In den jare ons heeren duysent vijf hondert ende veerthien upten lesten dach van Meye soe hebben die schout burgermeesteren ende schepenen van der stede van Hairlem geconsenteert gegonnet ende gegeven den gilde van Sinte Lucas omme den dienst Goids dair mede te vermeeren alsulcke ordinancyen puncten ende articulen als hier nae gescreven staen ende gebieden eenen ygelicken dien alsoe te houden op alsulcke boeten als hier nae volgen ende gescreven staen
1. In den eersten soe en sal nyement binnen der stede van Hairlem an den ambochte van den schilders beeldesnijers goudsmeden glasemakers borduirwerkers kannemakers ketelboeters pottegieters ofte geelgieters mogen wesen oft yet doen angaende van den ambochte voirscreven hij en sal eerst voer al poorter moeten wesen ende alsdan sal hij gehouden wesen te geven den ambochte drie gouden Rijnsche guldens ende een poorters kint sal geven anderhalven gouden Rijnsche guldens ende die te gaen an drien den heer de gerechte ende den outaer
2. Voert waert dat eenich van dese gildebroeders kinder hadden ende die ambocht begeerden te hebben soe sal den outsten soon in tambocht mogen commen luit een pont was ende waren der meer kinderen die sullen geven om in tambocht te commen twee pont was ende waert dat enich van desen gildebroeders voirscreven een dochter hylicte an een poorter of poorters kint die van eenich van desen ambochten voirnoemt ware ende in tgilde niet en ware die sal alsdan dat gilde mogen winnen mit twee pont was
3. Voert wat gesellen die van buyten comen wercken binnen der stede voirscreven langer dan veerthien dagen die zullen geven tot proffijt van den outaer twee stuvers mer des sal hij dair nae een jaer lanck vrij onbegrepen wercken mogen die de meester uuytreycken ende upleggen sal mer sullen altoes verthien dagen onbegrepen mogen wercken
4. Ende geen jongen die gast zijn en sullen tambocht mogen leeren zij en sullen eerst tot proffijt van den outaer geven twee pont was ende een poorters hint een pont was ende een soen van den ambochte sal van dien vrij zijn ende geen leerjongen van dese voirscreven ambochten en sullen mogen om broot gaen ende als enige leerjongen haer leerjaren uuyt zijn soe en sullen zij tambocht noch geene meesterye mogen setten sij en sullen ten alderminsten een jaer lanck gelt gewonnen hebben mit een meester ende dit upte boeten van drie pont als boven ende waert oeck dat enich gildebroeder enige leerjongen anname ende dat binnen ses weken de gesworen niet te kennen en gave die sal verbueren twee pont was off XII stuvers voir twas onvermindert de leerjongen tpont was
5. Voert soe en sal geen meester schilder meer tot enen male mogen aennemen dan twee jongen behoudelijck als enich van desen tween een jaer an tambocht geweest sal hebben soe sal hij noch een jonge an mogen nemen ende alsoe tot drie jongen toe tot enen male ende niet meer Ende des en sal hij geen leerjongen min annemen dan den tijt van drie jaren ende beeldesnijers goutsmeden glasemakers en sullen mer twee leerjongen teffens mogen hebben behoudelijck dat een van dese twee een jaer voir den anderen gewrocht sal hebben eer hij dander aennemen sal ende sullen oeck ten minsten drie jaren moeten leren Ende borduirwerckers en sullen mer een leerjonge teffens mogen hebben ende oick drie jaren ten minsten moeten leren Ende des sel men de leerjongen ses weken onbegrepen mogen proeven ende niet langer ende waert dat enich meester enige jongen langer hilden dan ses weken om te proeven sonder te besteden soe sal die meester een pont was moeten upleggen of zes stuvers ende waert dat yement ter contrarye dede van dat voirscreven is zoude verbueren drie pont te gaen an drien als boven gescreven staet
6. Voert soe en sal nyement anders gesellen mogen onderhueren ten sij bij wille ende consente van dengenen daer hij mede gewrocht heeft ende mit nyement te wercken binnen der stede noch bij hem selven meesterye te houden voir der tijt dat hij mit vrientscap van zijnen meester gesceyden es ende hem voldaen heeft ende dit altijt tot verclaringe van den oversten up die boeten van drie pont als boven Ende dat nyement na anders werck sal moeten loepen dair hij in dingwaere of es om hem dat ontbruyck ende ofhandich te maken upte boeten als boven Ende waert oick saicke dat yement enich werck angenomen hadde ende dat hijt duechdelijck alsoe bewijsen mochte ende een ander naderhant quame ende dit selfde werck anname wetens of onwetens of in wat manieren dat het anders ware die en sal dat werck niet mogen maken mer sal gehouden wesen dit werck over te geven ende te leveren dengenen diet eerst angenomen hadde Ende waert dat hij ter contrarye dede ende an dit werck hier en boven wrochte soe dick ende menichwerven als dit gebuerde sullen hem die gesworen bekueren van drie ponden ter tijt toe dat hij tselve werck overgegeven sal hebben ende dese voirscreven drie ponden te gaen als boven
</main>

##

<end>
</end>