Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1517_1

<begin>
</begin>
<main>
Alsoo in den tijden voorleden den ghilde ofte ambocht van den schoemaeckers binnen der stede tot onderhoudenisse van hueren outaer ende in die eere Goods sekere kueren ende statuyten gegundt ende ghegeven sijn ende in die kueren ende statuyten mede ghevoucht sijn gheweest der schaloodsemaeckers so alst volnae een ambocht ende hanterinck is gelijck toude bort dat daer off is uutwijst ende verclaert ende eenige puncten van dien na practijck ofte verloop van der tijt alsus den voorscreven ghilde ofte ambocht nyet nut ofte oorbaer en sijn mer in die stede van dien sijn behoufelick zeeckere andere puncten ende articulen alsus ende tot deser manieren ende tijt bet dienende So ist dat den voorscreven schoemaeckers ende schaloodsemaeckers die statuyten ende kueren in tvoorscreven oude bort verclaert al noch confirmeert ende ghesticht sijn bij den gherecht te weten dat voor hem dienen sal ende oick daer buyten eenige ander thans hunluyden oock nudt sijnde ende sijn dieghene die hiernae volghen ende beschreven staen dit al te samen ende tot des gherechts wedersegghen in der tijt wesende ende nyet langher
1. In den eersten dat gheen schoemaecker die van buyten binnen der stede ende vrijheyt [com]pt metter woone meesterye van den ambocht van schoemaecken setten noch houden en sal hij en zij eerst poorter gheworden deser stede ende hij en hebbe tot des schoemaeckers outaers 1 behouff gegeven ende betaelt vier Wilhelmus schilden item een ghezwooren poorter sal gheven twee Wilhelmus schilden ende een poorters soon een Wilhelmus schilde ende waert dat hier yemandt contrarie dede die waer upt[e] boet van drie pondt heeren gelts dat een derdendeel te gaen tot tghilts behouff dat ander derdendeel tottes gherechts behouff ende dat derde derdendeel tot des voorscreven outaers 1 behouff van welcken boeten d[i]e vier ghesworens die in der tijt van den voorscreven outaer off ambocht sijn nyemant en sal 2 mogen verdragen noch yet quijt laeten mer elcken daerof anbrengen sullen ende die gelijcke boeten offnemen bij ha[er]en eede ende deden sij des nyet te weten dat zijs verzwegen ofte nyet aen te brengen bij eede zoude zij de voorcreven boeten zelver ghelden ende coelen zonder eenich wedersegghen
2. Item so en moeten gheen schoemaeckers noch knechten wercken tsij scuerwerck off anders dan alleen de calck te ver- trecken binnen der twaelff nachten van Kersmis ende binnen den octaef van Paesschenen ende octaef van Pyncster ende die dagen van Vastelavont noch oock op gheen heilige dagen die de h[e]ilige kerck ghebiet te vieren opte boeten van twee schellinck heeren gelts tot des voorscreven outaers behouff also dick als daer yemandt gebroeckelick in bevonden worde indient bij daghe waere ende waert bij nachte ende ontijt dat waer op twintich schell[i]ngen heeren gelts te gaen an drie alst voorscreven is
3. Item waer dat yemandt van buyten inquame ende ridt geloyt leder ofte leversmeer [a]hier binnen brochte ende tselfde bij den gheswooren vercofte so alst nyemandt coopen en moet dan bij die ghezwooren die zal als van dien indien hij poorter is so goet ende cort recht hebben als een gast ende waert da[t] yemandt van den ambocht in tzelfde vercopen sijn gelt mede verdroncken hadde ende daernae eenige van denselve goeden tegen die voorscreven coopman cofte die soudt off hij woude om ghelijcke prijs hebben ende dat opte boeten van drie pondt heeren gelts te gaen an drien als voorscreven ende die twee ghesworen diet haer coopd[ac]h is die sullen alsdaer huer gelach vrij hebben

##

</main>
<end>
</end>