Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1521_1

<begin>
</begin>
<main>
Afgelesen upten XIXcn dach in Aprille anno XVcXXI presenten Bronchorst schout Montfoort Houte ende Paendren burgermeesteren Willem Engbertsz Claes Jansz Cantert Ysbrant Jacobsz ende jan de Wael scepenen
1. Alsoe die here ende gerechte mitter waerheyt verstaen hebben dat dese stede grotelick vercort ende bedrogen wordt in huer bierexcijs mits dat de brouwers veel biers uuytleveren mit cruycken ende kannen soe ist dat die here ende gerechte omme daer inne te remedieren ende voorsiene gebieden ende beveelen zeer scarpelick dat nyemant van den brouwers ende brousters binnen deser stede hen en vervorderen voortan eenich bier mit cruycken uuytegeven hetzij om Goidswillen off anderssins ende dat oick nyemant wye hij zij jonck off oudt hem en vervordere eenich biers mit cruycken off kannen uuyten brouwers huysen te halen hetzij om Goidswillen noch anderssins in eeniger manieren zonder te hebben expres oirloff ende consent van den gerechte ende dat voort nyet te mogen vercopen ende dit upte boete van drie ponden heren gelts te gaen een derdendeel tot behouff van den heere een derdendeel tot behouff van der stede ende een derdendeel tot behouff van den anbrenger zoe wel te verbueren bij den brouwer off brouster als oick bij dengeenen die eenich bier uuyten brouwers huysen alsvoeren gehaelt sullen hebben ende voort uptie correctie van der stede na gelegentheyt van der saicke
2. Gebieden ende beveelen noch dat voortaen geen brouwers noch brousters eenige scheyinghe uuyt hoeren huysen sullen mogen leveren daer naegoet off yet anders beter inne is dan scheynghe noch dat oick nyemant uuyten brouwers huysen voortaen en sal mogen halen eenige scheyinge daer nagoedt off yet beter inne is up gelijcke boete van drie ponden te gaen als voeren soewel te verbueren bij den brouwer off brouster als oick bij dengheenen die de scheynghe 1 dan voren verhaelt is uyten brouwers huysen gehaelt sullen hebben ende voort upte correctie van der stede naer gelegentheyt van der saicke
</main>
<end>
</end>