Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1538_1

<begin>
</begin>
<main>
Alsoe die heere ende gerechte verstaen hebben datter dagelicx veel ende groot bedroch geschiet in de ordonnantie van den molengelde van den koorne binnen deser stede soe ist dat sij dairomme seer scarpelick ghebieden ende bevelen alle poirteren ende ingesetene van deser stede
1. Dat nyemandt geenrehande koorn ter molen brenghen off senden sal hij en sal eerst selff comen off yemant van sijn huysgesin oudt wesende XV jaer ende daer over senden ende nyemandt anders alhier int huysken onder der stede huys daer die bewaerders van den molenexchijs dagelicx sitten te kennen gevende wat ende hoeveel korens dat hij gemalen wil hebben ende ter molen zal willen senden noemende die molenaer dien hij dat sal doen malen ende betalende dair off dat molengelt ende sullen die bewaerders van den molengelde dan telken een briefken geven van alsoeveel koorns als men verexchijst heeft welcke briefken elck telken den molenaer overleveren sal mit dat koorn dat hij verexchijst heeft ende geen briefken overleveren sonder koorn noch geen koorn sonder briefken ende dat oick niemant meer koorns ter molen en sal mogen brenghen noch senden dan tbriefken inhout op die verbuernisse van tselve koorn ende op een boete van drye ponden heeren gelts alsoe dick als eer ter contrarie dede te gaen tderdendeel tot sheeren behouff ende twee derdendeelen tot des pachters ende anbrengers behouff ende daerenboven op scarpe correctie van der stede na gelegentheyt der zaecken
2. Item zoe en sullen oick geen molenaers noch oick geen poirters ende ingesetene deser stede dat koern dat zij gemalen willen hebben off dat meel dat gemalen sal weesen tot gheenen plaetsen anders mogen uuytvoeren off uuytbrenghen ende weder innevoeren ofte inbrenghen dan doer drye poorten van deser stede als die Groote Houtpoort die Zijlpoort ende die Cruyspoort ende oick op die hoge molen staende binnen deser stede tusschen Scalckwijcker poort ende Sparwouwer poort binnen den tijde ende uuyre hiernae volgende te weeten van Onser Liever Vrouwen daghe Lichtmisse tot Alreheylighen daghe toe des morgens van zeven uuyren tot elff uuyren toe ende namiddach van een uuyre tot vijff uuyre toe ende van Alreheyligen daghe tot Onser Liever Vrouwen daghe Lichtmisse des morgens van acht uuyren tot elff uuyren toe ende namiddach van een uuyren tot vier uuyren toe op die boete ende correxie voirscreven
3. Ende sullen die molenaers altijt gehouden weesen de bewaerders die sacken te versetten ende die te voiren ontbinden ende weder binden ende te noemen denguenen dien se toebehoeren ende altijt hueren huysen kisten sloten te openen soe dicke alst den bewaerders belieft ende hem altijt goede warachtighe antwoirde te geven van tghene hem gevraecht werdt sonder qualick te spreecken off dairinne te liegen off te versaecken ende sullen insgelijcx mede doen alle backers brouwers ende andere poorteren ende ingesetene deser stede op die boete ende correctie voorscreven
4. Item zoe en sullen die molenaers die eetkoorn malen geen mout ofte brouwerskoorn om te brouwen mogen malen optie boeten ende correctie voirscreven
5. Item zoe en sullen de molenaers die brouwerskoorn malen om te brouwen geen koern mogen malen ten zij eerst begoten ende nat gemaect tot mout ten ware tarwe ofte rogge die welcke gemeyngt sal weesen elck achtendeel tarwe ofte rogge mit zoeveel oft meer mouts twelcke nat gemaeckt ende begoten is alst behoirt ende wel onder malcanderen gemenget ende anders en sal geen moutmolenaer eenich koorn moeten ontfanghen op sijn molen ofte molenwerff off in sijn huys off oick voeren in schuyten buyten die uuyterste breggen van der Spaerne ofte oick op waghens buyten die poorte ende soe en sullen die voirscreven molenaers oick mit geenrehande koorn duer die breggen ofte poorten varen ofte na hoir huysen dragen dan binnen den tijde ende uuyren die den molenaers die eetkoorn malen hiervoeren gestelt zijn all optie boeten ende correctie voirscreven
6. Item soe en sullen die poorteren ende ingesetene deser stede geenrehande koorn mogen doen malen in eenege cloosteren noch op orsmolens quaernen off anderswair dan optie molens binnen der vrijheyde deser stede ende en sullen van gelijcken geen backers enich meel mogen backen dan dat optie molens die eetkoorn malen binnen der vrijheyt deser voirscreven stede gemalen is dair men briefkens op scrijft ende en sal oick nyemant enich meel in tonnen ofte in sacken gort broet off eenich ander gebroken koorn mogen inbrengen tenzij dat men dat eerst ende al voeren te kennen geve den bewaerders van den molenexchijs eer men dat eerst uuyt eenege scepen op landt slaet ofte van eenege wagen lost ende dairvan betalen exchijs als in de ordonnantie van den molengelde verclaert is ende soe en sal oick nyemant in zijn huys mogen hebben eenich broot uuyt eenege cloosteren ofte vrije huysen gecomen opte boeten ende correctie voirscreven
7. Item soe sullen die molenaers gehouden wesen haer briefkens bij die wagen te hebben van tkoorn dat zij uuytvoeren ende oick als zij tgemalen koorn weder innebringen die briefkens van tzelfde meel bij haer wagens te hebben op die boeten ende correctie voirscreven

##

</main>
<end>
</end>