Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1538_2

<begin>
</begin>
<main>
Up huyden den XVen dach Martii anno XVe zeven ende dertich na den scrijven der stede van Haerlem hebben Wouter van Bekesteyn schout Jan van Zuyeren ende Gheryt Claesz burgermeesteren Jan Mathijsz Ysbrant Claesz Pieter Symonsz Kanscher Pieter Claesz Willem Harmansz Ramp MrQuiryn Diricxz ende Jan Raedt scepenen der voorscreven stede geaddeert gekuert ende gestatueert totte kueren ende ordonnancien van den sceepmakersgulde binnen derselver stede de poincten ende articulen hier nae volgende
1. In den eersten dat int derde articule van hueren kueren soe wel gecomprehendeert gehouden ende begrepen zullen wesen die poorteren van Haerlem die binnen der vrijheyt van hoer selffs hout schuyten doen maken als die scepen doen maicken upte boeten te gaen als in tselve derde articule verclaert staet
2. Item dat de sceepmakers ende anderen poorteren van Haerlem die binnen der vrijheyt van Haerlem sceepen off schuyten maicken off doen maken die lencte ende breete van de voorscreven scepen off schuyten leveren sullen bij de mate ende roede daer toe bij den schout ende gerechte voorscreven geordonneert geeyct ende gebrant Ende sal die sceepmaker off die de scepen off schuyt laten maken telcken reyse voor dat hij de voorscreven mate ende roede gebruyct ende gebesicht sal hebben geven een stuver totter voorscreven sceepmakers altaer behouff up gelijcke boete van drie ponden te gaen als voren Dese voorscreven ordonnancien ende kueren sullen gedueren tot wederseggen van den schout ende gerechte der stede van Haerlem voorscreven in der tijt wesende ende nyet langer
</main>
<end>
Actum mij tegenwoordich Jacobi
</end>