Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1539_1

<begin>
</begin>
<main>
[Int] jaer ons heeren duysent vijf hondert negen ende dertich upten vijften dach Octobris hebben de [schout ende gerechte der stede van Haerlem] gegont geaccordeert ende vernyeut den gemenen ghildebroederen van den linnenweversghilde binnen derselver stede [omme te vermeerren den] dienst Goids upt outaer van Onse Vrouwe Noot Goids in de prochykercke der voorscreven stede ende tot onderhoudenisse van deselve out[aer] [de] [ordonnancien] [statuyten] [ende] [kueren] die hier nae volgen gebiedende allen diegheenen die deselve ordonnancien statuyten of kueren angaen diezelve te onderhouden ende [na] [te] [gaen] [optie] boeten dair inne verclairt
1. Item in den eersten dat nyemant meesterye binnen Haerlem setten en moet hij en sal eerst ende alreede poorter wesen binnen Haerlem ende als hij poorter geworden is zoe en sal hij nochtan geen meesterye van linnen touwen setten hij en sal eerst binnen Haerlem een half jaer voor meesterknecht gewerckt hebben ende hij ende zijn geëchte wijf zullen wesen van goeden name ende van goede geruchte eer hij dat ambocht winnen sal Ende dat alzoe geschiet zoe zullen zij geven voer huer inneganck totten linnenwevers outaer behouff te weten een geboren poorter drie rijders een gast die binnen Hollant geboren is vier rijders ende die buyten Hollant geboren is vijf rijders up die boeten van drie ponden heeren gelts te gaen teen derdendeel tot mijns genadichs heeren behouf tander derdendeel tot den voorscreven gerechte behouf ende tderde derdendeel tot den voorscreven outaers behouf Ende dat geen meester meer dan drie touwen binnen sijnen huyse stellen moet upte boete voorscreven
2. Item zoe wanneer een geboren poorter of een gast dat ghilt sal winnen soe sal die heere van elex hebben een Rijnsgulden ende sullen daerenboven gehouden wesen goet betoech te bringen waer sij huer huysvrouwe getrout sullen hebben onderteyckent tselve betooch bij den pastoer die hemluyden getrouwet heeft aleer men hemluyden in tvoerscreven ghilde ontfangen sal
3. Item soe en moet nyemant van den linnenambocht voorscreven des anderen gescoren werck aennemen ten zij bij den gemoede van den gezworens ende van dengheenen diet geschoren heeft up die voorscreven boete te gaen als voren
4. Item zoe wye int ambocht wesende mit zijn alinge woonstadt uuytter stede van Haerlem voer mitterwone een jair of meer ende dan weder mitter woen in der stede quaem die en soude zijn ambocht nyet mogen doen noch die vrijheyt van den voorscreven ambochte genyeten hij en zoude eerst geven moeten tot des voorscreven outaers behouf drie gouden rijders upte boete als voren
5. Item zoe wanneer die gezworens van den voorscreven ambachte morgenspraicke houden sullen soe moet een yegelick van den ambochte mede bij den gezworens comen daer zij huer morgenspraicke houden sullen up die boete ende verbuernisse van een braspenninck alsoe dicke als hij dair niet en quame welverstaende dat zij gheen morgenspraiche en sullen mogen houden dan bij oirlove van den gerechte ende dat uptie correctie van der stede

##

</main>
</end>