Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1541_1

<begin>
</begin>
<main>
1. In den eersten zullen zij meester Boudewijn de Weendt die ten ontfange ende administracie van den voorscreven goodtshuysengoeden gestelt is laten bewarden mitter administratie van de goeden van denselven goodtshuysen soe wel in ontfange ende uuytgeven van den goeden van denselven goodtshuysen als anders ende hem in als tbewindt van dien laeten hebben naevolgende dinstructie hem dairaf gegeven sonder hem eenichsins dairvan te bemoyen
2. Item en sullen de voornoemde regierders ofte goodtshuysmeesters die nu zijn ofte naemaels wesen zullen egheen ontfanck hebben uuyt handen van partijen dan alleeninck van testamenten die men denselven goodtshuysen in gereeden ghelde maict ende van den penningen comende in de borden ende kisten van denselven goodtshuysen ende uuyt handen van den voornoemden rentmeester alsulcke penningen als zij mitter tijt in tstuck huerer dienst van noode hebben zullen dairaf zij gehouden sullen wesen den voornoemden meester Boudewijn de Weendt te leveren huere souffisante recepisse ten minsten onder thantteycken van twee van denselven goodtshuysmeesteren met welcke penningen deselve goodtshuysmeesteren doen sullen de distributie den armen ende voorts employeren thuerer alimentatie ende onthout als van outs gewoonlick is
Item en sullen geen meesters ofte dienaers van eenige der voorscreven drie goodtshuysen binnen den tijt van hueren dienst nyet mit huere medebroeders mogen contraheeren tzij int coopen of vercopen van eenige landt- los- ofte lijfrenten noch eenige coopmanscappen ofte contracten tegens den anderen doen of maicken direcktelick of indirectelick in eeniger manieren tselve goodtshuys dairinne zij dienende zijn angaende sonder weten ende expres consent van den burgermeesteren in der tijt wesende die daerop sullen mogen houden breeder communicatie indien hun belieft oft de saicke sulex sal eysschen
3. Item en sullen de voorscreven regierders nu noch in der tijt wesende gheen landt- los- lijf- ofte erfrenten vercopen noch denselven huyse belasten in eeniger manieren noch oick eenige nyeuwe edificien maicken oft excessive costelicke reparatien doen landt hueren oft proveniers aennemen dan bij scriftelick consent ende oirlove van den voorscreven burgermeesteren Mair indien zij belast worden bij oirloghen duer tijden sterften oft anderssins sullen tselve den burgermeesteren als oppergoodtshuysmeesteren te kennen geven ende hem leveren den staet ende last van denselven goidtshuyse bij goeden verclaringe in gescrifte omme naer groote van hueren last hemluyden dairvan te consenteren dat van noode wesen sal den armen behouflick zijnde
4. Item sullen de meesters ofte regierders van den voorscreven drie goodtshuysen gehouden zijn Sondacchs voor of nair hoochmisse elek in den zijne mit malcanderen te vergaderen in huere comptoren omme te tracteren ende te diffinieren van de gebreken die zij oft yemande van hemluyden huere officien exercerende bevonden sullen hebben of wat van noode sal wesen te doene voor den toecomenden tijt
</main>
<end>
</end>