Compilatiecorpus Historisch Nederlands 1.0 (CHN): ambtelijke teksten 1250-1800: haarlem_1560_1

<begin>
</begin>
<main>
1. De heere ende gerechte deser stede gebieden allen drappenierders die eenige wolle of vellen binnen derzelver stede willen brenghen oft doen brenghen tzij te water oft te lande in schepen ofte wagenen in sacken ofte in tonnen ofte andersints in wat manieren dattet zij dat zij die den waerdeyns in der tijt wesende laten besien eer zij die innedoen dat oock geen drappenierder hem en vervordere zulcke wolle ofte vellen weder uuyt te voeren buyten consente van den waerdeyns ende heuren weten alles optie verbeurte van tzestich ponden heeren gelts ende drye marcktdagen telckens twee uren van thienen tot twaelven toe voor de noene op de kaecke te staen ende daertoe noch thien jaren lanck zijne neeringe van den drapperye te verbeuren soo dicke als yemandt contrarie dese bevonden wert gedaen te hebben al naer uytwijsen twardeynsboeck
2. Ghebieden voorts allen poorteren ende ingesetenen deser stede van wat qualiteyt oft conditie zij sijn geen drappenierder wesende welcke drappenierders hen altijt reguleren sullen naer tvoorgaende verbodt dat zij van nu voortsaen hem nyet en vervoorderen eenige landtwolle ofte vreemde wolle vellen ofte gaerne binnen deser stede ende de vrijheyt van dien te brenghen ofte te doen brenghen tzij met schuyten schepen wagens oft andersints hoet zijn mach ende in eenige huysen te doen oft doen doen tzij 1 dat zijluyden dezelve wolle vellen ofte gaerne eerst te vooren omme daervan lakenen ofte lappen binnen deser stede gemaecket te mogen werden naer de gelegentheyt ende grootheyt van der drapperye van der Engelscher wolle die men geensints deur twercken van de voorscreven landt- ofte vreemde wolle beledt ofte behindert en wil hebben ende dit opte verbeurte van thien ponden ende correctie van der stede naer gelegentheyt van der zaecke
3. Ghebieden mede dat alsoo de principale neeringe van de drapperye deser stede jegenwoordich nyet wel gerieft en mach werden van arbeytsluyden dat alle degheene die eenige vreemde ofte landtwolle vellen ende gaerne binnen deser stede ende de vrijheyt van dien innegebrocht ofte doen brengen hebben omme alhier gereet gekemt gesponnen geweven ende tot laecken oft lappen gemaeckt te werden zij dezelve wolle vellen ende garen schicken weder uyt derzelver stede ende der vrijheyt van dien te brengen binnen acht dagen naestcomende op gelijcke boeten als vooren te gaen alle de voorscreven boeten aen dryen te weten den heere een derdendeel den gerechte een derdendeel ende de waerdeyns metten aenbrenger 't derde derdendeel
</main>
<end>
Aldus geslooten den derden dach Augusti 1560 presenten Barthout 2 schout Mr Quiryn Dircxs ende Wouter van Beecke- steyn burgermeesteren Jan Mathijssen Mr Jan van Zuren Adriaen Willemss Mr Huge Bol van Zanen ende Dirrick van Heussen schepenen Cornelis Jacobss Adriaen Gerritss ende Pieter Bol wardeyns Dirrick Joost Bratholomeus Jacobss Jan Cornelis Broerss Louris Willemss Cornelis Adriaenss Dirrick Wy ende Cornelis Gerritss oude drapenierders Ende afgelesen mette klocke opten 6en Augusti anno voor- screven presenten Barthout 2 schout voorscreven Mr Quiryn burgermeester Jan Matthijss Dirrick van Heussen schepenen der stede van Haerlem
</end>