Compilatiecorpus Historisch Nederlands 1.0 (CHN): ambtelijke teksten 1250-1800: ieper_1329_1

<begin>
Wie Robrecht van den walle Jhan van den Walle Jhan hauwiel Jacob van den werue ende willem danscoe makere scepenen van den yperscen ambochte Doen te wetene allen lieden
</begin>
Dat pauwels van inghelant Ende clais withoc porters jn ypre Ebben jcoght jeghen jhan de brueselare ende cres-tine zijn wijf poerters jn ypre ouer timene van den scamel werken van ypre Een leniene jmeitte lants Ende een alue lettel min of meer Ende alle de catelen diere up staen ende der toe behoren ripe ende groene Ert vast wertel vast ende naghel vast licghende ende staende an de zuut zide jnt hof dat was sheren niclais van der caerde wan of dat hem de vercopers kennen ende sien wel verghouden Ende Ebbens halm ende ghifte jworpen ten jmene boef van den scamelweken van ypre vornomt wel ende wettelike alse coustumen ende vsagen zijn binnen den yperscen ambachte Ende se ebbens hemleden jwet jwersceip van allen calengen jeghen allen lieden quite lanc omme quite ghelt behouden sheren chens van den lande diere vte gaet
</main>
<end>
jn or-conscepe van dezer kennesse ende van dezen alme wie scepenen vornomt ebben an dezen chartre jdaen onze zeglen vuthanghende jmaect jnt jaer van Cirdcie . m.ccc. ende achte Ende twintegh jn laumaent Saterdachs na sinte pauwels dach
</end>