Compilatiecorpus Historisch Nederlands 1.0 (CHN): ambtelijke teksten 1250-1800: ieper_1330_1

<begin>
Wie joris van derbeike jacob van gheraerd de puud Claeszoon ysembart ende willem de hanscoender schepenen van den yperschen ambochte doen te wetene allen den ghonen die dese lettre zullen zien ende horen leisen
</begin>
<main>
dat kerstine ghelins heift ghecocht ende ghecreghen heruelike ouer hare ende ouer hare hoir sieghen henric herleboud ende sieghen margriete zin wiif Drie Vierendeels ymets lants litel min of litel meer ligghende jn de prochhie van vla-mertinghe onder min here den graue van vlaendre binnen den yperschen ambochte tusschen den lande beatrise balch an deen zide ende tusschen den lande margriete herlebouds an dander zide van den welken lande de vorseide vercopers houden hem wel vergouden ende hebbens der vorseider kerstiins halm ende gheifte gheworpen wel ende wettelike al so vsage ende costume es jnt ypersche ambochte ende hebbent hare ghelooft ende ghewet te warandierene van allen Calegen sieghen allen lieden quite lant omme quite ghelt behouden sheren chins van den lande diere vte gaet
</main>
<end>
Jn orconschepe van deser dinc wie schepenen vorenghenomt hebben dese lettren ghezeghelt met onserleder zeghelen dit was ghedaen Jnt Jaer ons heren m ccc neghene ende twintech den tienten dach Jngaende van sporkele
</end>