Compilatiecorpus Historisch Nederlands 1.0 (CHN): ambtelijke teksten 1250-1800: ieper_1336_1

<begin>
Wie jehan de colvenare jacop van jehan hugheman willem de memere ende jehan van scepenen van den ypersschen ambochte doen te wetene tollen den ghonen die dese lettre sullen sien Ende horen leisen
</begin>
<main>
dat der denys scattin portre in ypre heift ycocht ende ycreghen erueleic jeighen heinric den puud henrix sone ende marien sinen wiue porters in ypre twee ymete lands ende een vierendeel lettel min jof lettel meer ligghende onder minen here van vlaendre binnen den ypersschen ambochte in de prochie van dickelinsch tween sticken dats te wetene een ymet ende een vierendeel tusschen clays spuuds lande an dene zide Ende den lande kanin lauwerins an dan der zide Jtem een ymet lettel min jof lettel meer tusschen jehan spuuds leene an dene zide Ende willems edewards land an dander zide Van den welken cope dat hem de vorseide vercopers kennen ende sien wel vergolden ende hebbent quite ghescolden den vorseiden here denys scattin Ende halm ende gifte gheworpen wel ende beloft ywarscep sonder calaigne jeighen ollen lieden quite land omme quite ghelt behouden sheren chens diere vte ghat
</main>
<end>
Jn orconscepen van desen dinghen hebben wie scepene vornomt dese lettre beseighelt met onsen seighelen vtehanghendedit was ydaen Jnt Jaer ons heren .m.ccc. zesse ende dertich saterdaghes vor sinte baefsmesse
</end>