Compilatiecorpus Historisch Nederlands 1.0 (CHN): ambtelijke teksten 1250-1800: ieper_1336_2

<begin>
Wie jehan de coluenare jacop van den werue jehan hugheman willem de memer ende jehan van den vliederbeke scepene van den ypersschen ambochte doen te weten tollen den ghonen die dese lettre sullen sien jof horen leisen
</begin>
<main>
dat jehan de puud henrix zone portre in ypre es comen vo[r] o[ns] in propre persone ende heift verkennet dat hi heift yhuert jeghen den here denys scattine portre in ypre twee ymete lants ende een vierendeel lettel min jof lettel meer ligghen[de] onder minen here van vlaendre binnen den ypersschen ambochte in de prochie van dickebusch in twen sticken dats te wetene een ymet ende een vierendeel ligghende tusschen clais puuds lande an dene zide ende den lande kanin lauwe[rein]s an dander zideende een ymet lettel min jof lettel meer tusschen jehans puuds lene ende willem edewards lande te houdene tiene jaer van sinte baefs messedeerste die comt elkes jaers elc ymet omme twintich scellinghe par te gheldene den vorseiden here denise jof den ghonen die dese lettre te hemwaerd hebben zal te tween paiementen int jaer dats te wetene dene helt te sinte jans messe mids zomers deerste die comt ende dander helt te sinte baefs messe dar nar comende ende alse vor van jare te jare ende van terminen te terminen de tiene jaer yduerende
</main>
<end>
jn orconscep van desen dinghen hebben wie scepene vornomt dese lettre beseghelt met onsen seighelen vtehanghende dit was ydaen jnt jaer ons heren .m.ccc zesse ende dartich saterdaghes vor sinte baefs dach
</end>