Compilatiecorpus Historisch Nederlands 1.0 (CHN): ambtelijke teksten 1250-1800: ieper_1339_1

<begin>
Wie jacop van den werue roegier buuc jehan martin jehan de puut Ende lambert queke scepenen van den yppersschen ambochte doen te weitene tollen den ghonen die dese lettre sullen sien jof horen leisen
</begin>
<main>
dat martin van zinnebeke heift ycocht ende ycreghen erueleic te sinen bouf ende te sins hoirs bouf jeghen jehan van oest ende kerstine sinen wiue van dickebusch viue linen lants ende drie ende zestich roeden ende ene alue lettel min jof lettel meer metten catelen diere vp sin ende toebehoren ligghende ende staende onder minen here van vlaendre bin den yppersschen ambochte in de prochie van dickebusch in tween sticken dats te weitene twee linen viue ende vichtich roeden lants lettel min jof lettel meer ligghende tusschen jehans van oost lande vors an dene zide En jehan pradels lande an dander zide Ende een ymet lants ende achte roeden ende ene alue lettel min jof lettel meer ligghende tusschen wouters van den walle lande an dene zide Ende willems van den hille kindre lande an dander zide Van den welken cope dat hem de vors vercopers kennen ende sien wel vergolden Ende hebbent quite ghescolden den vorseiden copre Ende alm Ende ghifte gheworpen wel ende wetteleke nar der vsage Ende costume van den yppersschen ambochte Ende hebbens hem ywet ende beloft ywarsceip sonder calainge jeghen ollen lieden quite lant omme quite ghelt behouen sheren chens vte gaende
</main>
<end>
jn orkonscepe van desen dinghen hebben wie scepenen vornomt dese lettre beseghelt met onsen zeghelen Dit was ydaen jnt jaer ons heren m ccc achte ende dartich suridaghs vor vastenauent
</end>