Compilatiecorpus Historisch Nederlands 1.0 (CHN): ambtelijke teksten 1250-1800: ieper_1341_1

<begin>
Wie lambert queke jacop van den werue jehan de puut jehan hauweel Ende daneel van dentringheem Scepenen van den yppersschen ambochte doen te weitene tollen den ghonen die dese lettre sullen sien iof horen leisen
</begin>
<main>
Dat diederijc hamelin heeft ycocht ende ycreighen erueleic jeighen jehan van zantvorde die men heet van den heechoute de twee parchelen hier naer ghenomt Dats te weitene tvierendeel van zestiene ymete helft lants lettel min iof lettel meer twelke leicht ymene met oliuier den duerewardere ondre minen here van vlaendre bin der yppersschen ambochte in de prochie van zantvorde marchierende an dene zide an scouents lande van der nuuuerbussche Ende an dander zide marchierende an oliuiers duerewarders lande Jtem twee ymete helfts lants lettel min iof lettel meer ligghende in de vorseide prochie van zantvorde onder minen here van vlaendre ende bin der yppersschen ambochte twelke men heet der pawinnen hofsteide ligghende tusschen simons lande van scoten an dene zide Ende jehan plateels lande an dander zide met gaders den catelen diere vp sijn van den welke cope dat hem de vorseide vercopre kennet ende het wel vergolden Ende heuet quite ghescolden den vorseide copre Ende halm ende ghifte gheworpen wel ende wetteleke naer der vsage ende costume van den yppersschen ambochte Ende heuets hem ywet ende beloft ywaersceip sonder calainge jeighen ollen lieden quite land omme quite ghelt behouden sheren chens van den lande diere vte gaet Ende behouden viertich scellinghe par erueleke rente siaers gaende vte den vierendele van den zestiene ymete ende vte den andren tween ymeten
</main>
<end>
Jn orkonscepe van desen dinghen hebben wie scepnen vorseit dese lettre beseighelt met onsen zeighelen vte hanghende Dit was ydaen int jaer ons heren m ccc een ende viertichsaterdaghs van sinte luux dach
<end>