Compilatiecorpus Historisch Nederlands 1.0 (CHN): ambtelijke teksten 1250-1800: ieper_1348_1

<begin>
Wie jehan houweel lambert queke jehan van den recke joris van der beike ende diederic herebrecht scepenen van den ypersschen ambochte doen te weitene tallen den gonen die dese lettre zullen zien ende horen leisen
</begin>
<main>
dat der jehan de mets portre in ypre es comen vor ons in propre persone ende heift igheuen ywillecuerd ende yconsenteird omme gode ende in alemoessenen den here jacoppe van dixmude ende den here jehan stekerape porters in ypre of voghden s[cuue]rame van den ymenen scamelweken van den achte prochien in de steide van ypre eweleic ende erueleic van ten vorseiden scamelweken bouf Viue ymeite lants viertiene roeden min lettel min jof lettel meer ligghende onder minen here van vlaendre binnen den ypersschen ambochte in de prochie van zelebeke bachten den houe dat was sher lambert morins an de west zide streckende toten straetkine dat gaet te waerstine waerd Van den welken lands dat hem de vorseide here jehan de meth ouer hem ende ouer sin hoir houd wel vernought van den vorseiden voghden in de name van den vorseiden scamelweken Ende heuet hemleiden ten scamelweken bouf ywed ende belooft te warandeirne jeighen allen lieden zonder caleigne behouden sheren chens vte gaende Ende es te weitene dat de vorseide here jehan de meth effen mach ende ontfanghen de blade ende de profite van den vorseiden lande alse langhe als hi leift ende es te weitene dat vten vorseiden lande gaet viertich scel-linghe par erueleke siaers de welke tgasthuus van der belle der vp heift
</main>
<end>
Jn orconscep van desen singhen hebben wie scepene vornomt dese lettre beseighelt met onsen zeighelen vte hanghende dit was ydaen jnt jar ons heren .m. ccc zeuene ende viertich saterdaghs nar onser vrauwen dagh in marte
</end>