Compilatiecorpus Historisch Nederlands 1.0 (CHN): ambtelijke teksten 1250-1800: ieper_1370_1

<begin>
Het es gheordineirt bi scepenen den XXVIJ ende al den upperghezuoorne van al den neringhe van der stede van Ypre smaendaeghs in de pinewouke in 't jaer M CCC LXX ende bi trouwe ende eede ghezuoren te houdene van scepenen van den XXVIJ 1 ende ghezuoorne vorseid alle de pointe hierna volghende Ende dese pointe zal men houden als wel up vreimde als up poorters
</begin>
<main>
1. Al voren dat van nu vortan niemen ghene zoene eeschen moet noch ooc enighe gheiven up ene boete van x lb den gonen die se zoude eesschen of doen eschen alsdicken ende als menichwaerven als hi se yesche of dade eeschen in wat manieren dat het ware ende up x lb den gonen die se gave ende van os veile personen als er gheven zouden Vort dat se niemen beloven moet up de vorseide boete ende al had se yemen belooft vordan ze zoude men dat belof te nienten wisen te wetten ende van ghere weerde newaer dat toten desen tyt belooft es daer of staet elc up zijn goede rechte
2. Item wie die aerd ende engien vinden of zouken zal omme enech goed van yemen te ghecrighene in enegher maniere stille of lude ende onderenech ander dexel bedectelike an yement zenden zoude of an yement doen tekenen dat waren den gonen die 't zoude doen verzouken x Ib olsdickent ende menichwaerfven ende den gonen diere ghezend zoude wesen x lb ende waert datter enegh bedreegh met woorden ygheven ware of ytekent of anders der toe ghedaen dat ware J jaer ybannen te zine
3. Vort es gheordineert dat niemen hem vercleeden moet met enighen brudecome te zinen huwelike zonder vader broeder of 't kint van den brudecome of van der bruut ende die de bruut leeden zouden up x Ib van elken persoon diere meide vercleet zoude zijn
4. Item dat niemen enighe bruut of brudecome ghiften moet noch yemene andersyet gheiven te haerleider bouf no doen gheven in enigher maniere stille of lude of voor de brulucht of der achter up de boete van x lb elken die se name ende elken die se gave
5. Item dat niemen ghene voorfeeste noch achterfeeste van bruluchten houden moet noch doen houden up x lb
6. Item dat men ghene feeste van bruutluchten houden moet daer meer lieden werden van buten huus danne x sceutelen up IIJ lb van elker sceutelen die der boven wesen zoude van den welken boeten de bruud ende de brudecome ghenouch zullen doen ende die betalen Ende ne moet gheen van den scotelen vorseid eneghe ghifte gheven noch doen gheven den brudecomme of der bruud of yement anders up de vorseide boete van x lb olsoo't boven ghezeit es Ende bi desen zal men ghene ghemene feeste houden omme i gro olso men te voren plach
7. Item dat niemen offeren moet enighen niewen pape noch enighen kinde dat men begheift meer danne v s par up de boete x lb vorseid
8. Item dat niemen ne ghenen kinde dat men heft als men 't kerstin doet noch dervoren noch derachter meer gheiven moet danne XIJ grote up de boete van x lb die 't gave ende x lb die 't name
9. Item dat niemen moet gheiven enich ghelt of ander dinc te enighen kercganghe noch der voestre of den mesnieden enighe ghifte gheiven noch dervoren noch derachter up de boete van x Ib die se name ende x Ib die se gave Maer elc mach zine mesnieden ghiften bin zinen huus wonende met zyns selves goede
10. Item dat men te meidewinter noch te nieudaghe noch ter sceppinghe van enigher bruutcledren enigher mesnieden of permentier ende voederaers enighe ghifte gheiven moet van buuten huus up x lb die se gave ende die se name noch yemene anders te haerleder bouf ende onder enech ander dexel up de vorseide boete
11. Item dat niement ghene maeltijt houden moet noch yement ten heitene stelle binnen 's kyntsbedde no dervoren no derachter up x lb elken diere came ende x lb die 't gave
12. Item dat niemene moet bidden t' eneghen bruden of kinde eneghe ambochten of hemleden tekenen of doen tekenen omme yet van hemleden t' hebbene stille of lude up x lb
13. Item waert dat enech vreimde man bin der stede came gheven eneghe ghifte ter contrarie van den pointen vorseid zo zoude de gone die 't name quite moeten de boete van den vreimden ende niet min zijn selves boete ghelden die hy deran verbuert zoude hebben ende ols menigghe als deran ligghen zoude moghen
14. Item wie die art of engien zouken zal omme bi eneghe zijdweighe ter contrarie van eneghen van den pointen vorseid te doene in enegher maniere stille of lude dat es den gonen die 't zouken zoude x lb als dicken ols men 't dade ende vinden zoude Ende van ollen den vorseiden pointen ende van elken zonderlinghe werden moghende de XXVIJ ende alle de upperghezuoorne van allen neringhen elc in alle de neringhe die onder hem zijn te onderzoukene te bevindene ende up te ghevene bi haren eede zonder enech verdrach ende zullen hebben van allen den boeten 't vierendeel de here de helt ende de stede 't vierendeel Ende waert dat enech ghezuoren hem hier niet en quite dien zullen seepenen corrigieren van zulker mesdaet als deran ligghen zal eist van zinen eede of anders eist bi roukelooshede eist bi voorzienicheide 2
</main>
<end>
</end>