Compilatiecorpus Historisch Nederlands 1.0 (CHN): ambtelijke teksten 1250-1800: ieper_1376_1

<begin>
Wie jacob van thoroud ende jan van den hogheweghe scepenen Jn brucghe in dien tiden doen te wetene allen lieden
</begin>
dat cam voor ons als voor scepenen Bertelmeeus walrijc van ypre kende ende verlijede dat hie ontfanghen heift bi der hand van michiele hallen viere ponden ende achte sceleghen groter torn Commende van enen coope van enen ypersschen lakene twelke pieter maertinis de fousee coopman van bourgis in spaengen cochte tieghen den vorseiden bertelmeeuws walrijc also de vors bertelmeeus aldaer zeide Van welken vorseiden viere ponden ende achte sceleghen groter torn bertelmeeus walrijc vors hem aldaer wel ghepaeit hild ende den vors michiel hallen ende pietren maertinis de fousee ende hem allen wien datter quitantie of behoort te hebbene der of quite scalt
</main>
<end>
Jn kennessen van desen dinghen hebben wie scepenen vors dese lettren huuthanghende beseghelt met onsen zeghelen dit was ghedaen int Jaer .m.ccc. zesse ende tseuentich vpten neghen ende twintichsten dach van october
</end>