Compilatiecorpus Historisch Nederlands 1.0 (CHN): ambtelijke teksten 1250-1800: ieper_1383_1

<begin>
</begin>
<main>
Tusschen den goeden lieden van der steide van Yppre of ene zyde ende der castelrien van Yppre of ander zyde hebben gheschillen gheweest van den pointen die hierna bescrevene staen
Alreeerst van den poorters van der vorseide steide die buten scependomme van der steide gheseiten zyn de welke die van der steide vryen willen van taillen ende zettinghen in de castelrye te gheldene daerof de goede liede van der castelrie zeiden ende maintenierden de contrarie segghende dat alle maniere van lieden porters ende andre in de castelrye gheseiten schoudech waren metter vorseide castelrye cost ende last te draghene van allen taillen ende zettinghen
Item zo zeiden ende maintenierden de goede liede van der castelrye van Yppre dat bi haren keuren alle maniere van lieden porters van Yppre of andre die uter castelrye van Yppre scheeden zouden bi huwelike of bi verwoonene dat die gheiven zouden den heere van onder wien zij scheeden zouden ende der prochye daer ute zij scheeden zouden den tiensten penninc van al haren goede bede erve ende katele Ende waert ooc also dat enighen porter van Yppre of andren wie hi ware enich goed verstorve inde castelrie vorseid dat zy daerof den tiensten penninc schoudech waren te gheivene van yssuwen daerof de steide maintenierde de contrarie segghende dat bi den keuren die men alle jare maecte of vernieude of maken mochte of verniewen in de castelrye de steide van Yppre van haren previlegien costumen ende usagen niet schudech waren verminct te wesenen want hare porters ten keuren van der castelrye niet en behoorden
Item zo zeiden de goede liede van der castelrie dat zy in tiden van oorloghen zwaerlike ghequetst waren ende gheweist hadden in de orloghe van Brabant ende elre van den waghenen die zy gheleivert hadden der vorseide steide als zy weider ghekeert waren van den vorseiden orloghe so en gaf de steide nemmeer enen waghene met IIIJ paerden danne XIJ grote sdaechs ende danne moeste de castelrie vorseid noch van elken waghene gheiven XIJ grote sdaechs 't welke der castelrie cam te groten costen ende grieve nochtanne en hadden zi daeromme ne gheen verlaet noch verdrach van haers zelves orloghe
Van den welken gheschille de goede liede van der steide ende castelrie gheaccordeert zyn in der maniere also hierna vollecht mids dat onsen gheduchte heere Mynheere van Vlaenderen consenteren wille
Alre eerst dat alle porters ende portigghen wonende in de castelrye vorseid binnen den prochyen daerof de kerken staen binnen den scependomme dats te weitene zente Jhans sente Jacobs zinte Michiels ende den Briele ende de porters die wonen in de castelrie in porters goeden als chensiers ende porters die dienende zyn in de vorseide castelrye zyn schuldech vry te zine van allen taillen te betaelne met der vorsede castelrye niet jeghenstaende dat zy gheen huus open en houden in de vorseide steide maer alle maniere van andren porters ende portigghen die vry willen zyn van taillen syn schuldech huus open ende vier bernende al 't jaer te houdene in de steide van Yppre up haren cost utegheleit drie waerven XL daghe in elc jaer dat zi buten weisen moghen hare goed te bereckene dats te weitene XL daghe in den lentin XL daghe in den oust ende XL daghe in den herevst Ende daer zy 't aldus niet en hilden ende het ter waerheit vonden worde bi scepenen van Yppere wien de kennesse toebehoort so waren sy schuldech ontpoortert te weisene bi scepenen van Yppre ende taille te gheldene in de prochye daer zy wonen zouden
Voort zo es gheacordeert zo wat portre van Yppre dien vortan goed versterven zal in de castelrye van Yppre dat hi dat goed vry wech zal draghen zonder yssuwe derof te betaelne Maer zo wat late van der castelrye porter t'Yppre zoude becommen bi cope bi verwoonene of bi huwelike dat die schuldech zyn yssuwe te betaelne der castelrie van zulken goede als zy hadden ten tiden dat zy late waren
Voort te welken tiden dat onsen gheduchte heere Mynheere van Vlaendren te doene zal hebben van orloghen ende de steide in zine name utetrecken zal so hebben de goede liede van der castelrie gheconsenteert dat zy der steide leiveren zullen also veile waghenen als van noden weisen zal na den state van den orloghe zonder scamp ende daerof zo wert de steide schuldech te betaelne van elken waghene met IIIJ paerden XXIIIJ s par sdaechs ende van enen waghene met IJ paerden XVJ s par sdaechs ende also van andren in 't avenant behouden in allen zaken der heerlycheit van onsen gheduchten heere ende in allen andren zaken behouden den previlegen vryheit wetten costumen ende usagen van dervorseide steide ende castelrye
Supplyeren omoedelike de goede liede van der steide en de castelrie vorseid u Gheduchte heere ende uwen eidelen rade dat ghi bi speciaelre gratien omme pays ruste ende acoord tusschen ons die beede uwe omoedighe subgite zyn te noorreerne de vorseide pointe consenteren ende approberen wilt ende elken zulc beseighelte derof gheiven datter namaels geschil of ne ghevalle
</main>
<end>
</end>