Compilatiecorpus Historisch Nederlands 1.0 (CHN): ambtelijke teksten 1250-1800: ieper_1396_1

<begin>
Wij france slingher ende wouter van Jn deise tijt vogden ende Jn de name van de heilijchen gheest van ypre doen te weitene allen lieden
</begin>
<main>
dat wij ouer ons ende ouer onse nacommers vogden van den heilijchen gheest voors kennen dat wij scoudich zijn den aermen wedewaren viere scell paris den gasthuse van nasareth .iij. sc par erueliker renten siaers de welke wij hem zijn scoudich ende belouen te betaelne alle Jare telken sinte bamesse ende dit commende Ende sprutende vte cause van enen halme van xxxij. D eruelike siaers die pieter de nayer ende jhan van als aeldijnghen van Jacoppe van vp ghedraghen hebben onsleiden Jn de name van den heilghen gheest voors omme te deelne ende te distribueirne Jn diuerschen percheelen bin der steide van ypre also ende Jn der manieren dat de brief der vp ghemaect ende ghezeghelt metten zeglen van pietren ende jhanne voors mentioen maken den welken wij tonswort hebben ghedaen
</main>
<end>
Jnt Jaer ons heren m ccc iiiixx ende zestiene des maendaghes Jn de paesschedaghen derde dach Jn april
</end>