Compilatiecorpus Historisch Nederlands 1.0 (CHN): ambtelijke teksten 1250-1800: ieper_1422_1

<begin>
Ordonnancen ende statuten up d'ontissinghe vande kinderen zynde inde bewarenesse van vader ende van moeder of van eeneghen anderen haren vriend of maech of van weesen zynde inde bewarenesse van vader of van moeder of van eeneghen van hare vooghden of vriend of maech vernieut ende uutgheroupen present den heer ende scepenen den XXIIIe dach van Lauwe int jaar XIIII ende XXIJ
</begin>
<main>
Eerst so wie voort meer ontvoeren ontleden of ontissen eenich cnapelin kind of dochterkin zynde inde vooghdie bewarenesse ende houdenesse van vader ende moeder of van vader of van moeder of van eenichs anders vooghds bewarers ende houders niet dienende tvoorseide cnapelin kind om hure noch te werke gaende om hure noch broodwinnende met eeneghe oppenbaren ambochte nerringhe of coopmanscepe weder het ware dancx of ondancx vanden cnapelin kinde of dochterkin datter ontvoert ontleet of ontist zoude wesen of weder het ware dancx of ondancx vanden ghonen in wiens vooghdie bewarenesse ende houdenesse zy zyn zouden dat ware den ontvoerer ontleeder of ontisser ende alle zyne hulpers ende medepleghers vanden dochterkinne up twiel ende der ontvoerighe ontleedighe of ontisseghe vanden cnapelinnen kinde up den pit ende alle hare hulpers man hoofden up twiel danof men indaghinghen doen zoude naer den coustumen vanden vierscare ende voord gaen alzoer toebehoort
Ende es te wetene dat cnapelin kinders of dochterkinne dienende met yement omme hure of om werk gaende omme hure of huerlieder broodwinnende met eeneghen uppenbaren ambochte nereinghe of coopmansceppe niet gherekent zyn noch schuldich zyn gherekent tzine in vooghdien zynde maer haers vrye selfs noch sculdich zyn begrepen tzyne in dit voorseyde statuut ende ordonnancie
Ende es te wetene dat cnapelin kinders of dochterkinne dienende met yement omme hure of om werk gaende omme hure of huerlieder broodwinnende met eeneghen uppenbaren ambochte nereinghe of coopmansceppe niet gherekent zyn noch schuldich zyn gherekent tzine in vooghdien zynde maer haers vrye selfs noch sculdich zyn begrepen tzyne in dit voorseyde statuut ende ordonnancie
Ende in ghelyken kinderen woenende in caberetten of in stoven al eist dat zy wuenen met vader of met moeder of met eeneghen anderen haerlieder vooghd of vriend stove of caberet houdende zyn gherekent haer selfs ende niet in vooghdien zynde
Ende es wel verstaen dat waert alzo dat yement met eeneghen dochterkinne in bewarenesse of in vooghdien zynde zo voorseyd es vleesschelic gheselscip hadde zonder yewers te leedene dat datte gherekent zoude zyn ontleeden ontissen ende als of hyse wech gheleedt hadde
Ende es vort verstaen dat tusschenghaners makelaers of makeligghen gherekent werden als ontissers in deser manieren dat eist up hemlieden gheprouft van twee orconden die zullen elc verbueren L lb ende zeven jaer den ban
Item waert so dat eenich cnapelin kind ontvoerd ontleed of ontist zynde alzo voorseyd es name de ontvoerrighe ontleedighe of ontisseghe in huwelicke tvoorseyde cnapelin kind zoude onthoird ende ontherfd wesen van alden goede dat hem toe zoude moghen comen by rechter horye niet mueghende deelen van vader of van moeder of van eeneghen van zyne vrienden ende maghen wyf of man Ende zoudent deelen ende hebben de ghonne die zyn goed sculdigh zoude zyn te deelene mids dat gestorven ware
Ende in gelyken ware dat eenich dochterkin ontvoerd ontleed of ontist zynde als voorzeyd es name den ontvoerer ontleedre ende ontissere in huwelicke tvoorseide dochterkin zoude onthoird ende ontherfd wesen van allen goede dat hebben zoude te dier tyd ende van alden goede dat haer toe zoude moghen commen by rechter horye ende zoudent hebben ende deelen de ghonne die haer goed schuldich zouden zyn te deelene mids dat zoe ghestorven ware
Item waert zo dat eenich cnapelin kind onvoerdt ontleed of ontist als voorseyd es niet name ende melde de ontvoerighe ontleedeghe of ontisteghe ende derby bleve zonder te commene ter stedewaert ende ten vrienden ende maghen waerd zo zouden de vrienden ende maghen vanden cnapelin kinde hebben al zyn goed onder hande tharen proffite ende dat tot anderstont dat het commen zoude ter stedewaert ende ten vrienden ende maghen waert omme te doen by rade van hemlieden
Ende in ghelicken waert dat eenich dochterkin ontvoerd ontleed of ontist als voorseyd es niet name ende melde den ontvoerere ontleedere of ontissere ende daer by bleve zonder te commene ter stede waert ende ten vrienden ende maghen waert zo zouden de vrienden ende maghen vanden dochterkinne hebben al haer goed onderhanden tharen proffyte ende dat totte anderstont dat zoe commen zoude ter stede waert ende ten vrienden ende maghen waert omme te doen by haerlieden raede
Item wie eenich cnapelin kint of dochterkin ontvoerd ontleet of ontist zynde ontfanghen zal wetende dat ontleed ontvoerd of ontist es vernachtende int huus binnen scependomme ende het bevonden worde byder goeder waerheid dat ware den man diet doen zoude up twiel ende den wive haer selfs zynde diet doen zoude up den pit
Item wat mannen die voortaen eeneghe weduwe of ander wyf haer selfs zynde ontvoerde of ontleedde daer zo vele toeghedaen ware dat men imwaers doen mochte dat haers ondancx ware te dien tyd dat zoe ontvoerd of ontleed ware dat ware up twiel hem ende al zyne hulpers ende medepleghers ende die met hem in volghen ende in vaerden zyn zouden Ende es te wetene dat de wiven die haer selfs zyn verjaert zynde dienende met yemende omme hure of te wercke gaende om hure of haer brood winnende met eeneghe uppenbaren ambochte nerringhe of coopmanscepen
Item waert dat eenege weduwe of wyf haers selfs zynde ontvoerd of ontleed zynde als voorseid es wilde nemen te manne den ontvoerer of ontleedre ende consent dade ten huwelicke ende ghinghe omme dien te meldene eldre dan te haers selfs huus in verholicker stede dat ware den man ende twyf elcken up de boete van L lb ende VIJ jaer ghebannen tzyne uuten lande van Vlaendren den man up zyn hoofd ende twyf up den pit maer wille eeneghe wedewe of eenich wyf haer selfs zynde nemen ende melden den ontvoerer uppenbarelicke te haren huus of tharer prochiekerke ende voor yement dat mach zoe doen zonder begryp ende verbuerte
Item dat niement wie hy zy over eenich traittied van huwelicke van eeneghen cnapelinen kinde of dochterkinne niet zyn selfs zynde maer in vooghdie als voorseid es noch daer men make versekerthede van huwelicke zonder tconsent ende wille van vader ende moeder of van vader of van moeder of van eeneghen anderen haren vooghd of vriendt in wies vooghdie waerde ende houdenesse dat zy zyn ende zonder tcousent van tween van den naesten vrienden van svaders weghe ende twee vanden naeste vrienden vande moeder weghe die zyn zullen binden lande up de boete van L lb p ende VJ jaer ghebannen tzyne
Item waert zo dat eenich cnapelin kint of dochterkin niet haer selfs zynde maer synde in de vooghdie bewarenesse ende behoudenesse van vader of van moeder of van eeneghen anderen vooghd of vriendt van nu voortan make versekerthede van huwelicke of vorworde ende belofte van trauwen of andersins zonder den wille ende tconsent van den ghonnen in wier vooghdie waerde ende houdenesse hy of zoe zyn zouden als voorseid es ende zonder den wille ende tconsent van tween van de naesten maghen van svader weghe ende tween vande moeder weghe die zyn zouden binden lande elken van hemlieden ende den ghonnen met wien zy versekerthede van huwelicke of voorwaerde ende belofte van trauwen of andersins maken zoude als voorseid es up de boete van L lb p einde VIJ jaer ghebannen tzyne
Item dat niement wie hy zy eenighe zake of voordeel hebben of nemen moet in eenegher manieren by eeneghe engiene omme huwelic te makene of te helpen makene up de boete van L lb P
Item wie voord meer wederzeicht eeneghen ban van huwelicke ende dat ontsegghen niet achtervolcht dat es up L lb p ende VIJ jaer ghebannen tzyne Of wie voort meer eeneghen ban wederzeicht twederzegghen achtervolghende byden hove van Therenburch ende dat of te valt by dat hy sentencie jeghen hem heeft zo zal de man of twyf die den ban wederseicht heift moeten betalen alle de costen van sentencien die zy daeromme ghedaen zullen hebben ende voort verbueren de boete van L lb p ende VIJ jaer ghebannen uuten lande van Vlaenderen den man up thoofd ende twyf up den pit
Ende alle de voorseyde pointen es de vooghd vander stede by zynen eede sculdich te volghene ende te wette te legghene ter vierscare weder en partie claecht of ne doet ende te vulvolghene ende alwaert alzo dat de vooghd by eeneghen engiene achterbleve van den vervolghene te wette zo zyn scepenen ghehouden hem daerof te manene ende te versouken dat hyt te wetten legghe up zynen eed
</main>
<end>
</end>