Compilatiecorpus Historisch Nederlands 1.0 (CHN): ambtelijke teksten 1250-1800: ieper_1427_1

<begin>
</begin>
<main>
Up den tiensten dach van Spoorkele [in 't jaer MCCCC] 1 zeivenentwintich soo was by vochd ende sceipenen ghemeenlyc ghetermineirt in de ghemeene camere omme den meesten oorboore nudscap ende p[roufite van] 2 den gouvernemente van onzer vrauwen gasthuuze up de maerct ende van den huuze van den hooghen zieken als weizende de principaelste godsh[uuzen] 3 toebehoorende der stede van Ypre ende de welke huuzen van haerleidere eersten beghintsele ende fondacie meest ghefondeirt hebben gheweist ende voorzien van den goede van den voorderes porteren van der stede voorseid ende ooc waer vochd ende sceipenen ende specialic de vochd ende de drie upperste sceipenen al tote noch hebben ghezyn ghecostumeert te stelne ende te committeerne t'elken van den huuzen voorseid alle jaere zoo wanneer de wet heift ghezyn vernieut vochden wye hemleiden gheliefde Ten occusoene van welken zo commen was ter kennesse van den voorseiden vochdende sceipenen 't goed van den huusen voorseid niet altoos hadde gheweist ghegouverneirt ende gheregiert ten meesten oorboore ende proffyte van dien omme hemleiden in 't gont dat voorseid es te quitene voor Gode ende voor de werelt dat men omme deise voorooghene jaerscaere ende voordan alle jaere als de wet vernieut wert t'eeuwelycheiden altoos ten alre eersten dat men goedlycx zal moghen ombieden zal ende verghaderen in de camere voorseid vochd sceipenen raden de hoofmannen ende de goede lieden van den grooten rade van den zeivenentwinteghen en de notablen van der stede in menichte ende ghetale ghecostumeert ende daer kiesen t'elken van den voornomden huuzen twee vochden by meesten voisen ende vermeineghene goede notable ende heerbare personen van welken elke twee vochden werden daer zy ghecoren zullen zyn ende hebben 't regement van haerleider jaerscaere ende zweeren ter presencie van den ghonen die se ghecoren zullen hebben dat zy omme de voorseide officie niet ghebeiden hebben noch ghedaen bidden by eeneghen bedecten middele ende voort 't goed van den huusen te regierne ende te bestierne ghelyc haer selfs goede in der manieren dat 't zelve goed beede in ontfanghe ende uutgheivene loyaellike gheconverteirt wert in den rechten ende noodzakeliken oorboore van den huusen vorseid waer elc vochd wert ende el nieuwers in gheenre maniere onderhoudende ende doende onderhouden de previlegen van den huuse vornomd naer den verclaerse van dien ende ooc alle de andere oordenancen ende statute niet contraryerende den voorseiden previlege van pointe te pointe gheene prejudicie draghende in tyden toecommende of yet ghedaen es gheweist tot noch of in 't een of't andere huus contrarie den zelven previlegen of statuten nemaer niet min dat zy werden ghehouden voortan ghans onghequetsts ende gheheel
Ende zullen voordere hebben de zelve vochden de auctoriteid ende vulcommende oordenance van te verhuerne ende te verceinsene de pachten landen ende huusen van den voorseiden huusen zonderlinghe ten termyne van tiene jaeren ende niet langhere ende alle andere zaken te doene ende te oordeneerne niet uuteghesteiken naer dat hem dynken zal oorboore ende proffyt elc in 't zyne zonder dat zy daeromme ghehouden werden t'heesschene vochd ende sceipenen die t nu zyn of naermaels weizen zullen eenech consent jof het en waere dat hemleiden dochte beitere ghedaen dan ghelaten behouden emmer dat zy ten hende van elker jaerscare ghehouden werden te doen maken by haren ontfanghere eene generale rekenynghe van ontfanghe ende van uutgheivene van haerleider jaerscare ende die te doen doene in de voorseide ghemeene camere met opene duere Ter welker rekenynghe vermaend werden te commene alle de zelve persoonen by wyen al zulke vochden ghecooren zullen zyn Wel behouden waert zoo dat de jaerscare van der wet ende van den vochden ghecoren zoo voorseid es gheexpireirt ende de rekenynghe ghedaen de ghone die alsoo vochden gheweist zouden hebben van den gasthuuse ende huuse van den hooghen zieken vooren gheexpresseirt weiden ghecoren worden ende ghecommitteirt of eenech van hemlieden dat dat wel weizen zoude moghen ghelyc van den tresorie van der steide
Ende omme dies de zelve vochd ende sceipenen uterlike begheeren alle de zaken hier voorscreven te weizene ghehouden goed vast ghestade ende van werden t'eeuweliken daghen soo was ten zelven daghe by hemleiden voordere ghesloten als moghende naer den inhoudene van den boucxkinne te oordeneirne ende te makene kueren ende statuten van nieus maer gheene te moghen reikene by hem alleene te registreerne over statuut 't gont dat voorseid es in de registre van der stede ende te gheivene elc van den vochden van den huusen vornomd coppie gheteekendt omme 't zelve statuut insghelycx gheregistreirt te weizene in haerleider registre Ende waren doe vochd Mer Jan Belle heere van Boesinghe ende sceipenen Michiel Paeldyng Christoffels de Maets Lyonneel van Scooten Olivier van Dixmude Jan Buedin d'oudste Michiel van der Huele Jooris de Ryke Pauwels Bourgois Jacop de Broukere Jan de Meimere Christoffels Croeselin Michiel Belle ende Jacop van der Haghe
</main>
<end>
</end>