Compilatiecorpus Historisch Nederlands 1.0 (CHN): ambtelijke teksten 1250-1800: ieper_1449_1

<begin>
</begin>
<main>
Omme eeneghe hem beclaecht hebben dat als haerleden vriend ende maech binnen stede wonende ghestorven was poorter zynde daer of men hier binder stede dede roupen eenen wetteliken deelban zy verachten ende versteken waeren van harer hoyrie by dat zyt niet en wisten noch thaerer kennesse commen was
so es gheordeneert omme dat elc ende elc weiten zoude zo wanneer eenich deelban ghedaen ware van eenighen dooden poortere zynde ende buuter stede wonende ende ghestorven dat men bi eenen bode van der stede weighe zenden zal tsondaechs naest volghende den daghe dat hier tYpre een zulc deelban ghedaen wert ter prochiekerke binder hoochmesse daer de doode te wonene plach ende ghestorven es ende daerin de kerke doen roupen hooghe ende overluut dat hier tYpre tsondaechs te vooren eenen deelban gheroupen es ten fyne dat zine vrienden ende maghen ende alle de ghonne die van hem deelen zullen willen weiten moghen waer ende wat plaetsen men hier binder stede de uutdeelinghe doen zal ten costen vanden goede dat achter den zelven dooden bleven zal zyn
</main>
<end>
Vute gheroupen ter halle tYpre den VIIJsten dach van sporkle jnt iaer duust vier hondert neghene ende veertich present de scouthete Michiel de Bloncke ende Roegir vanden Pitte scepenen
</end>