Compilatiecorpus Historisch Nederlands 1.0 (CHN): ambtelijke teksten 1250-1800: ieper_1459_1

<begin>
</begin>
<main>
Up de questie voor Mynheeren vooghd ende scepenen ter halle t'Ypre ghereisen tusschen Roelant Bryde als last hebbende van Bonnoire Olivier uuter name van minen gheduchten heere of een zyde ende joncvrauwe Marien van Loo wedewe van Jan de Hont poortersse van Ypre of andere ter cause van dat de vorseide Roeland in de name als boven zeide ende mainteneerde dat Zegherine van Bambeke bastaerde dochter van Pieter van Bambeke die hy hadde bi der vorseide joncvrauwe Marie gheen poortersse van Ypre ten daghe van hueren overlydene en was mids dat de zelve Pietere huer vadere ghediede was ende gheen poortere van Ypre jeghens 't welke de vorseide joncvrauwe dede zegghen dat zoe was ghezwoorne poortersse van Ypre ende ten tyde dat zoe de vorseide Zegherine hadde zoe ooc poortersse was bi den welken huere vorseide dochtere sculdich was poortresse van Ypre ghehouden ende gherekent t'sine de welke overleden was binnen deser stede met meer redenen bi elc van den voorseiden partien dertoe gheseit Ende nadien dat bi der zelver wet up al ghelet was alsoo 't behoorde ende zonderlinghe up 't ghuent dat Lippin ende Boudin van den Kerchove bastaerde kinderen van Boudin van den Kerchove vremde die hy hadde bi Christinen nu 't wyf van Pieter Petereel poortersse van Ypre was 't welke hemlieden niet ghebueren mochte mids dat huer vorseide vadere vremde was ende ooc andren van ghelyken
So was bi der vorseide wet verclaerst dat de vorseide Zegherine ten vorseiden daghe van hueren overlydene niet sculdich en was gherekent t'sine als poortersse van Ypre
</main>
<end>
Ghedaen in scepenen camere den XVJsten dach van novembre in 't jaer duust IIIJ neghene ende vichtich Present Andries Paelding stedehoudere van den vooghd Jan van Lichtervelde Joris Paelding filius Michiels Lamsin van Loo Joris de Witte Jacop Fagheel ende Jan Suerlin scepenen van Ypre
</end>