Compilatiecorpus Historisch Nederlands 1.0 (CHN): ambtelijke teksten 1250-1800: ieper_1498_1

<begin>
Wy scepenen van der stede van Ypre doen te wetene allen lieden
</begin>
<main>
dat Jan de Wulf filius Wulfaerts poorter van der voorseide stede heift ghecocht ervelic om hem zyn hoirs ende naercommers jeghen Cornelis Steenbuerch ende Goris Kavael als vooghden van Bertyn de weese Jan Dalays ooc poorter van der selver stede ende dat bi der wille wetene ende consente van vooght ende scepenen ghedaen in huere ghemeene camere daer wy mede ende over waeren ende van Mer Joos van der Woestene ruddere in desen tyden uppervooghd van allen weesen van der vorseide stede ende scependomme van Ypre ende voort by ghebode ghedaen ter halle metten ludene van den clocxkinne also verre als 't der vorseide weese angaen mach twee huusen d'erve derondere ende al datter thoebehoort erdvast ende naghelvast staende ende ligghende d'een neffens den anderen an de zuudzyde van den cleenen Mondstraetkinne tusschen den huuse ende erve van den woukere toebehoorende Bertyn Dallays up eene ghemeene muer an de westzyde of een zyde ende te Zacstraetkinne an de oostzyde of andere streckende achterwaert toten huuse ende erve van Michiel Dallays ende es te wetene dat de pype staende bachten up eene ghemeene plaetse van erve es ghemeene der voorseiden tween huusen vercocht ende tween anderen huusen daerneffens danof't een toebehoort den vorseiden Bertyn ende 't ander den voornoemden Michiel ende zin se schuldich ghehaefdich te houdene te zuverne ende scoone te makene t'hueren ghemeenen costen t'allen tyde dat van nooden wert
Betvoort dat de necessarie staende over d'Ypre voor 't huus van Joos Dallaeys es ooc ghemeene den vorseiden vier huusen ende es schuldich insghelicx ghehaefdich ghehouden t'sine ooc t'hueren ghemeenen costen al t'eeuwelicheden Van den welken coope de vorseide vercoopers hemlieden ghehouden hebben ende houden over wel vernoucht ende te vullen ghepayt ende hebbeins hallem ende ghifte ghegheven den voorseiden coopere wel ende wettelic naer costumen ende usagen van der vorseide stede ende zyn hem den zelven coop sculdich te waranderene van allen calaengen jeghens allieden mids twintich scell par erveliker renten 's jaers den cloostre van Sinte Maertins Beede de vorseide partien voor ons verclarende by eede desen coop goet ende loyael wesende
</main>
<end>
In der welker ghedenckenesse ende verzekerthede wy desen chatre hebben ghedaen zeghelen metten erfachteghen zeghele der vorseide steide van Ypre In oorcondscepen van desen scepenen Jacop de Brouckere Heinric de Vie Pieter van Nieuwenhuus Willem de Boerleke ende Ghilein de Wilde Dit was ghedaen den een ende twintichsten dach van octobre in 't jaer duust vier hondert achte ende neghentich
</end>