Compilatiecorpus Historisch Nederlands 1.0 (CHN): ambtelijke teksten 1250-1800: ieper_1520_1

<begin>
</begin>
<main>
Omme dat angaende de visitacie examen ende uutgheven van den ziecken persoonen poorters ende vremde commende ten hove van den hooghen siecken omme ghevisenteert te zyne voortan goede reghelen ende oordene ghehouden worden by den meester ontfanghere ende ghezworene van den zelven hove ende de ziecken ghesolagiert in de costen ende lasten die zy supporteren ter cause van der voorseide visitacie uutgheven ende anderssins in diversche partien zoo hebben Mynheeren voocht ende scepenen van deser stede van Ypre gheadverteirdt zynde ende als uppervoochden van den voornoemden hove gheordonneert te onderhoudene de pointen ende articlen naervolghende alle andere vryheden oordonnanchen ende statuuten van den zelven hove dese niet bejeghenende blyven in huere cracbt ende viguer
Eerst dat up 't voornoemde hof van den hooghen ziecken voortan werden drie ghezworene ende niet meer die de voochden van den huuse daertoe kiesen ende oordonneren zullen van den provengiers ende provengiereghen daer wonende beede ziecke ende ghezonde de medste ende ydoonste omme d'examen ende visitacie van den persoonen daertoe te doene Ende en zal den ontfanghere van den voornoemden godshuuse gheen ghezworene moghen zyn noch te dier causen sallaris daerof ontfaen
II. Item ten fine dat de voorseide ghezworene voortan zekerlicken zouden moghen procederen in't examineren ende uutgheven van den ziecken lieden voor hemlieden commende daerinne vele ghebreken daghelicx bevonden zyn es gheordonneert ter assistentie ende hulpe van den voornoemden ghezworenen dat elcken als men yemande visenteren zal up't voornoemde hof eenen medecyn gheleert ende expert metgaders oick eenen ghezworen meester cirurgien commen zullen ten voornoemden hove ende aldaer metten voornoemden ghezwoorene van den selven hove de visitacien doen Ende en zullen de voorseide drie ghezworene aoders gheene visitacie moghen doen dan metten voornoemden meesters medecyn ende cirurgien up zulcke visitacie ter contrarie ghedaen van onweerden endedaerof ghecorrigiert te zyne ter discretie van den voochden Bevelende oick den ontfanghere ende meester van den hove gheene briefven te delivrerene dan van den visitacien die ghedaen werden in der maniere voorscreven up correctie arbitraire
III. Item omme de voornoemde examen ende visitacie te doene zyn gheordonneert twee daghen deweke te wetene 1 ten welken daghen de ghesworene ende oick den meester medecyn ende cirurgien ghehouden werden ten hove te zyne ende aldaer elcken ghereedtscepe te doene welcken medecyn ende cirurgien 't hof voorsien zal van redelicken sallaris ter discretie van den voochden
IV. Item zullen de voornoemde ghezworene ende medecyn visenteren ende vonnessen de persoonen daer commende behoorende t'huerlieder kennesse ende berechte ende anders meinende al volghende den appoinctementen ende verbanden daerof wesende ende nu onlancx vernieuwet by den hoven ende godshuusen van Ghendt Brugghe Ypre ende 't Vrye
V. Item werden de persoonen die begheeren zullen ghevisenteert te zyne ten voornoemden hove ghehouden te betooghene lettren van certificacien van den steden ende plaetsen daeronder zy wonachtich zyn inhoudende de plaetse van huerer domicilie ende residentie ten fyne dat by dien men weten mach te wiens kennesse ende examen zy behooren zullen
VI. Item angaende de visitacien die men gheploghen heeft te doene buuten den voornoemden hove van persoonen die niet machtich en zyn ten hove te commene ofdaer ghebrocht te zyne zonder quets van hueren lichame es gheordonneert dat men voortan zulcke visitacien doen zal by den wetene ende consente van den voochden ende anders niet die daertoe committeren zullen eenen van den ghesworenen metghaders den cirurgien ofte medecyn de welcke ghezworene zullen hebben redelicken sallaris voor huer voyage te wetene van visitacien die zy doen sullen buuten der myle twintich scell par ende binder myle zestien scell par sdaechs ten ware dat uut consideratien daer meer anclave 't welcke staen zal ter discretie van den voochden An welcke visitacie ende sallaris den ontfanghere van den hove gheen recht hebben zal verbiedende den selven ontfanghere voordan gheen compositie tacx ofte voorwaerde te makene metten ziecke lieden ofte huere boden ter cause van de voornoemde visitacie in eenegher manieren
VII. Item zullen voortan de arme ziecke persoonen commende ten goeden vrindaghe binnen deser stede omme d'aelmoesene van der stede ende goede lieden ontlast zyn van den costen die zy supporteren ter cause van den plaetsen ende cramen daer zy logieren 't welcke hof van den hooghen ziecken nemen zal t'hueren laste ten expirerene van desen loopende pachte jeghens Martin Gheeraerdt cramere ende pachtere van den cramen zonder voortan buter busse daerinne men d'aelmoesenen van den ziecken besteidt yet te nemene ofte mynderene in eenigher manieren
VIII. Item ende angaende den bodebrieven daerof den ontfanghere useirt die jaerlicx te vernieuwene ontfaende daervooren van elcken persoon hebbende eenen bodebrief veerthien grooten elcx jaers es gheordonneert dat men daerof voordtan niet meer useren en zal maer zullen de bodebrieven ghedueren tot den wederoupene van den voochden ende ontfanghere Dies werden de persoonen die hemlieden behelpen willen met den bodebriefven ghehouden hemlieden alle jaere eens te presenterene met huere voornoemde briefven den voorseiden ontfanghere de welcke ontfanghere ghehouden werdt die presentacie te registreerne midts daervooren van hemlieden ontfaende voor elcke presentacie vier scell par ende niet meer
IX. Item werdt oick de voornoemde ontfanghere ghehouden registre te houdene van al den persoonen die by den hove vortan uutghegheven werden stellende van dien de namen ende toenamen metgaders oick de plaetsen ende steden daer zy wonachtich zyn ende den tydt dat zy uutghegheven zyn
X. Item alle poorters ende poorterssen van der stede van Ypre commende ten voorseiden hove v omme ghevisiteert te zyne ende by den selven hove uutghegeven over besiect indien zy begheeren ontfaen te zyne als besiect provengier in 't voornoemde godshuus werden ghehouden ander waerf hemlieden te doen visenteren by twee ghezworen medecynen ende eenen cirurgien in een van den vyf steden van Vlaendren ende by den selven verclaerst zyn ende uutghegheven beziect betooghende van dien behoorlicke certificatie Ende mids desen en werdt van gheene noode voordere noch breedere visitacie te doene met lettren requisitoire in den hoven van Ghendt ende Brugghe alsoo men tot nu toe ghecostumeert heeft van doene welcke costume hiermede cesseren zal ten ware dat yemandt begheerde in de voornoemde plaetsen ghezonden te zyne Ende al ditte behoudens de rechten ende vryheden in anderen zaken van den voornoemden godshuusen te wetene dat de voorseide persoonen alsoo uutghegheven zullen moeten bevonden zyn poorters van der stede van Ypre ende poorters kynderen zoo 't van oudts ghecostumeert es al volghende zekeren ordonnancien ende verclaersen van den voornoemden godshuuse t'andren tyden daeraf ghemaect
XI. Item ende als van den ghezonden provenen zoo wanneer die ghevallen zullen men zal daerof voorzien een loopte ende onghehuweden weerlicke persoonen ende gheen andere ende die provenen gheheele ofte halfve gheven oude miserable persoonen die andersins huercosten niet winnen en connen daerinne by den voochden van den voornoemden hove van goeder discretie ende caritate meer ofte min naer de qualiteyt van den persoon die zoo ontfaen werden daerinne lastende hueren eedt ende conscientie
XII. Item te ordonnerene up 't voornoemde hof eenen toeziendere van den stoffen ende wercken die men voortan aldaer ende up d'ander huusen ende godynghe van den selven hove halen ende bezeghen zal
XIII. Item den ontfanghere van den hove zal ghehouden zyn in 't last van den poortier up 't voornoemde hof zonder ter cause van dien eenighen sallaris te rekenen ten laste van den selven hove maer werdt 't hof voortan daeraf ontsleghen
XIIII. Item d'ontfanghere van den voornoemden hove en zal oick gheenderande landen noch goedynghen den hove toebehoorende moghen houden noch hebben in pachte maer zal men die verhueren ende verpachten ten meesten oirboire ende proffyte van den hove zonder oick ter cause van dien eenighe hooscheden ofte proffyten t' ontfaene
XV. Item en zal oick gheenderhande hout van upgaende boomen noch tailge in den busch moghen vellen noch doen hauwen ten zy by den wetene ende consente van den voochden ende oick dat hy metgaders den voorseiden toezienre eerstwaerf t' samen oversien zal hebben de voorseide boomen ende busschen ende daeraf den voochden rapport ghedaen
XVI. Item en zal gheen recht noch gebruuck hebben van eenighen hau ofte snouckynghe an de boomen van den hove noch van eenigher stoffe oudt ofte nieuwe comende van refectien ofte andersins in wat manieren dat zy maer zal ghehouden zyn die te vercoopene ende te bekeerene ten meesten proffyte van den huus ende 't selve in rekenynghe te brynghene zoo 't behoort
XVII. Item de cappellaen van den voornoemden godshuuse ter causen van den kerckelicken dienste die men ghecostumeert es van doene van messen mattenen ende andersins in de drie natalen ende beede den kermessen van den godshuuse zal hebben voor hem ende zyne dienaren t'samen voor al elcx jaers de somme van 2 Ende mids dien werdt d'ontfanghere onghehouden voortan eenighe maeltyden te ghevene den voorseiden cappellaen noch oick zyne dienare ter causen voorseid maer zal 't hof daerof zyn onghehouden Ende en zal oick de ontfanghere voorseid te dier cause voort meer gheen costen in rekenynghe moghen brynghen ten laste van den godshuuse zo men tot nu jaerlicx ghedaen heeft
XVIII. Item wie voortan ontfanghere werdt van den voornoemden godshuuse zal ghehouden zyn ten ancommene van den voorseiden zynen officie zeker te doene van al der handelinghe administratie ende diesser meer ancleven mach ende eedt doen 't selve officie ghetrauwelicke te bedienen totten wederoupene van den voochden 't welcke wederoupen zy zullen moghen doen t'allen tyden als 't hemlieden believen zal t'hueren simpelen zegghene zonder andere redene of cause daertoe te betooghene
XIX. Item van al 't ghuend dat 't voornoemde godshuus by slote van rekenynghe dien men jaerlicx doen zal bevonden werdt goedt hebbende ende te vooren zynde in ghelde boven der letster ghevallen jaerscaere ende den loopende jare dat werdt den voornoemden ontfanghere elck jaers als men de groote rekenynghe doen zal ghehouden te bewysene ende up te legghene ghereedt in eene ghemeene cofere rustende ten huuse van eenen van den voochden sluutende met drie sluetelen daerof elck van den voochden ende den ontfanghere een hebben zullen ende 't selve employeren in coope van renten ende goedynghen ten meesten oorboire ende proffyte van den godshuuse
XX. Item men zal oik in de kiste sluuten den grooten rekenyncbouck zonder die voortan meer te laten onder den ontfanghere van den zelven hove
XXI. Item ende nopende de costen van der maeltydt die men jaerlicx doet ten laste vanden voornoemden godshuuse de welcke men bevyndt beloopende ter grooter somme waer goedt die te modereren in redelicheden daerinne lastende den voochden van den zelven hove
Dit naervolghende es den taux ende sallaris dien den ontfanghere ende ghezworene metgaders oick den upperdeken van den hove ter causen van visitacien ende examen etc zullen ontfaen
I. Eerst elck persoon poortre ofte vremde die by den hove ofte ghezworenen van den hooghen ziecken ghevisenteerdt ende uutghegheven werden over besiect zal betaelen elcken ghesworenen diere present es ter visitacie ende anders niemende IJ sp
II. Den ontfanghere voor den brief van uutghevene IIIJ sp
III. Inschelycx zal men ontfaen van elcken persoon die ghevisenteert ende gheganst werdt IJ sp
IV. Ende van den ghonen die in veursten ghestelt werden zal men alleenlick ontfaen visitaciegheldt om de ghezworene ende en werdt zulck persoon die in veurste gheselt es niet ghehouden daerof eenighe briefven te lichtene of hy en wilde ende die nemende zal betalen voor den brief IIIJ sp
V. Item van eende procuratie VIIJ sp
VI. Item van een onterfbrief VIIJ sp
VII. Item van nieuwe briefven als d'oude verlooren zyn IJ sp
VIII. Item van eenen nieuwen zeghel als d'oude ghebroken is J sp
IX. Item alle de voorseide briefven moeten ghemaect zyn in parkemente ende zeghele uithanghende
Den sallaris van den upperdeken
X. Van elcken persoon die uutghegheven werdt ten voorseiden hove VI sp
XI. Van elcken die huwet VI sp
XII. Van cruuce te verstellene IJ sp
XIII. Als de ziecken sterfven van elcken 't beste upperste habyt alsoo 't van oudts gheuseert es of drie ponden par daervooren daeraf de hoirs ende vrienden van den ziecken die ghestorven werdt de kuere zullen hebben
XIIII. Item den voorseiden taux zal men doen regystreren ende stellen in een berdt hanghende in der ziecken huus omme elck daerof de kennesse t hebbene ende hem daernaer te reghelene
XV. Item in alle de pennyncboeten zal hy hebben zyn rechte zoo dat van ouden tyden gheuseert es te wetene 't derde ende 't surplus ten proffyte van den hove daerof hy ghehouden werdt ten henden jare rekenynghe te doene
XVI. Item van allen boeten van twintich scellinghen par upperwaerdt en sal den voorseiden dekenen niet moghen composeren zonder 't advis van den ontfanghere ende voochden maer zal ghehouden zyn die te calengierene ende te wette te stellene
XVII. Inschelycx van allen delicten ende mesusen die zal hy moeten te wette stellen ende gheensins daerof composeren
XVIII. Item nopende den grave die deken es buuter myle hy heeft alsghelyck recht ende sallaris als de upperdeken gheploghen heeft t' ontfane ende dat by coope van zynen officie jeghens de stede omme t welcke waer van nooden met hem ende der wet te tracterene omme zynen loon te restringierene ghelyck men den sallaris van den upperdeken nu ghedaen heeft
</main>
<end>
Aldus ghesloten met scepenen raden hooftmannen ende den college van den XXVIJen den XXXen in octobre XVe twintich
Dese articlen zyn by Myneheeren voochdt en scepenen in huere ghemeene camere collegialick vergadert wesende by den voochden ontfanghere ende provengiers aldaer present gheadvoert gheconsenteert ende ghelast van nu voortan onderhouden te zyne ende die ghestelt te zyne in dit registre van rekenynghe van den hove in der manieren naervolghende Actum den VJen in meye XV L
</end>