Compilatiecorpus Historisch Nederlands 1.0 (CHN): ambtelijke teksten 1250-1800: ieper_1524_1

<begin>
</begin>
<main>
I. Vuytte dien dat ter kennessen van commissarissen wezende ter audicie vander rekenynghe van der casselrie van Ypre ghedaen in april vichtienhondert vierentwintich naer paesschen ghecommen es zeker desordre ende onghereghelthede wezende binnen der voorzeider casselrie van Ypre alzo wel in tonderhouden vanden dinghedaeghen vut zendynghe vanden penninghen vanden prince ordinaire ende extraordinaire costen vander zelver casselrie upt doen vander audicie vander rekenynghe maken vanden state van diere als upstellen endeannemen vanden processen vacatien vanden wethouders t'vernieuwen vanden wet dat men ghewoonelick es te doenne telcken twee jaren eens ende anderseins hebben die ghecommunicquiert metten vassalen edelen notabelen ende der wet vander zelver casselrie wezende ter audicie vanden voorseide rekenynghe ende by heurlieder advize ende adveu gheordonnert de naervolghende pointen ende articlen daer naer hemlieden te reghelen de toecommende wethouders ghehouden werden van nu voortsan te voughene reghelene ende die tonderhouden totter byder disposicie vanden tyde anders up gheordonneirt zal werden up peynen ende verbuerten van huerlieder keerels ende andere wedden emolumenten ende vacatien die elck van hemlieden jaerlycx ter cauzen vanden state vanden scependomme heffende ende ontfaende zyn zullen ende oic den ontfanghere greffier ende pencionnaris vander zelver casselrie up de zelve peyne elc alzo verre alst hem angaet
II. Eerst hebben gheordonneert dat men byden commissarissen vernieuwen zal de voornomde wethouders te zulcken tyde als men die ghewoonnelick es te vernieuwene
III. Item dat men ten zelver daghe oick alle jaere doen zal de rekenynghe vander casselrie van alle den ontfanghe ende vuyt ghevene der zelver casselrie binnen dien jaere ghebeurt ende overcommen wezende
IV. Item dat den ontfanghere vander zelve casselrie gheene vuytzendinghe van sprincen pennynghen costen noch andersinsen zal moghen doen dan by billette elcker prochie elcke splete de welcke billetten gheteeckent zullen wezen metter hand van hem ontfanghere ende den greffier vander zelver casselrie
V. Item dat zulcke vuyt zendinghen niet ghedaen wezen en zullen dan by den laste ende ghemeenen over een draghene van die vander wet daer over gheroupen de vassalen vander zelver casselrie die daer toe byder voornomden vander wet teenen prefixen daghe ghedachvaert ende bescreven zullen werden by brieven gheteeckent by den voornomde greffier die vanden zelven brieven registrene houden zal metgaders vanden namen ende toenamen vanden vassaelen die ter zelver dachvaert commen ende compareeren zullen omme de voornomde vuytzendinghe te doenne
VI. Item ende alwaert datter alle de voornomde vassalen niet en compareerden nemaer alleenelick eeneghe in clenen ghetale die vander wet ende de vassalen present wezende en zullen daeromme niet differeren te procedeerene ter voornomder vuytzendinghe nemaer men zal dezelve doen metten ghonen die ter voornomder dachvaert present ende voor oghen wezen zullen de welcke vassalen hebben zullen voor heurlieder moyte aerbeyt ende vacatien zo zy van ouden tyden ghehadt hebben n vergaderinghen vanden affairen vander voornomder Casselrie
VII. Item ende die vander wet zullen hebben zo zy ghewoonlick gheweest hebben thebbene telcken als zy collegewys vergaderen zonder meer ende zal vanden presenten vanden voornomden wethouders ende vassalen oic registrene ghehouden wezen by den voornomden greffier
VIII. Item men zal oic alle jaere achte oft thien daeghen voor den dach vanden vernieuwene vander wetende auditie vander rekenynghe gheheel ende al ghereet maecken de zelve rekenynghe ende zal d'ontfangher ghehouden wezen te zulcken daghe voor de compste vanden commissarissen als hem vander wet gheordonneirt wezen zal voorde voorseide wet daertoe gherouppen de voornomde vassalen inder maniere voorscreven de rekenynghe te doenne als eene voor rekenynghe omme by dien claerlyc te wetene den staet van der zelver casselrie ende alle erreuren ende difficulteiten die by ghebreke van dien ghebueren mochten gheeviteert te wezene ende al zo de zelve casselrie behoorlic ende claerlyc gheregiert te werdene ter versekerthede proffytte ende gherustichede vander inwoonende ende ondersaten van diere up peyne voorscreven
IX. Item dat van nu voortan de ontfanghere vander zelver casselrie ghehouden wert zyn ontfanghersceip in persoone te bedienene ende ter plaetze te resideerenne zonder dat hy vermoghen zal t'zelve te doene bedienene by stedehouder by wat manieren dat zy dat hem hier by verbooden es
X. Item werden de voornomde wethouders huerlieder ghedinghen ghehouden thoudene van veertien daghen te xiiij daghen up ghelycke peyne
XI. Item dat men van nu voorts ghehouden wert thoudene teender verzekerder plaetsen binnen den huize vander zelver casselrie eenen grooten coffere oft twee met drie sloten omme daerinne te legghenne alle de rekenynghen ende ander secreten vander zelver casselrie daer toe wezen zullen drie sluetels daerof den eenen rusten zal onder den voorscepenne vanden college eenen anderen onder den tweetsten scepenne vanden zelven college ende den derden onder den ontfanghere
XII. Item dat men in t'zelve secreet niet gaen en zal dan ter presentien vanden ghonen die de zelve sluetels te bewaerene hebben zullen ende ten minsten de vyf scepennen vanden college en de twee vanden vassalen ter versekerthede vander zelver casselrie ende insetene van diere ende daerof oic registrene te houdene zo voorseid es
XIII. Item dat de zelve vander wet omme wat zaken dat zy gheene nieuwe processen annemen vervolghen noch solliciteeren en zullen dan byden over eendraghen vanden gemeenen college van scepenen ende daerup thebbene tadvis van den voornomden vassalen daer toe vermaent wesende zo voorseyt es
XIV. Item dat de voornomde processen ende ander affairen vander voornomde Casselrie ghesolliciteert ende gheachtervolgd zullen werden by eenen scepene greffier oft ontfanghere ten minsten coste vander casselrie ten waere dat de materien zwaer ende van importante waren ende dat de voornomde vander wet bevonden noodtzaeckelick wezende dat daer meer persoonen vanden college ofte andere behoorden ghesonden te wesene dat te stellende theurlieder discresie als t'proffyt vander casselrie ende inwoonende vandien bezwooren hebbende
Onder ghescreven
</main>
<end>
Aldus gheordonneert by den voornomden commissarissen ten daghe ende jaere voorscreven my present gheteeckent ROKEGHEM
</end>