Compilatiecorpus Historisch Nederlands 1.0 (CHN): ambtelijke teksten 1250-1800: ieper_1530_1

<begin>
Allen den ghoonen die dese presente letteren zullen zien of hooren lesen voocht scepenen ende raedt van der stede van Ypre saluut Doen te wetene
</begin>
<main>
dat uute dien dat 't officie van den clercscepe ende ontfangherscepe van den loyers van der pertse van den doucken binnen 't welcke vachierende was by resignatie ghedaen in onsen handen by Jacques d'Estrielles die 't zelve officie zekeren tyt bedient ende ghepossesseirt heeft so eis 't dat wy over ons ende onse naercommers in wetten over ende uuter name van der voorseide stede 't voorseide officie by uutroupinghe metten luudene van den clocxkinne vercocht hebben onsen wel beminden poortere Lucas Bonnet filius Antheunis up wien 't zelve officie als lest verhooghere bleven es voor de somme van achtenvichtich ponden grooten vlaemscher munte die up den dach van hedent zynen behoirlicken eedt in onsen handen ghedaen heeft omme ghetrauwelic 't voorseide officie zyn leven lanc gheduerende te bezittene ghebruuckene ende in persoone te bedienene ofte in zyn absentie uuter stede zynde ziecte ofte ghelycke zinnen hebbende by eenen van den loyers van der voorseide pertse ofte by yemandt anders by consente van der wet te doen bedienene
Ende wert ghehouden t' ontfanghene de penninghen commende van den doucken diere gheloyt werden te wetene zes penninghen van elcken sticke die te distribuerene ende ghevene den voorseiden loyers heffende ende behoudende daerof zyn handeel ende poortie ghelyc een van den zelven loyers
Wert voort ghehouden goed registre te houdene van alle de boeten ende vonnessen die loyers begheeren zullen gheregistreert t' hebbene ende dat up den sallaris van zes penninghen par vooren verclaerst zonder meer ende de boeten metgaders twee loyers t'elcken woensdach dinghedach over te ghevene naer costume
Voort als eeneghe doucken commen zullen die by mesvaerwene ofte anderssins by den voorseiden loyers ghewyst werden te vervisiterene by loyers in 't blaeuwe indien zulcke vervisiteirde lakenen weder voor loyers ghebrocht arghere bevonden waren dan 't voorgaende gheregistreirde vonnesse de voornoemde clerc wert ghehouden den drapier indien hy 't begheert daerof een brievekin te ghevene onder zyn handteeken midts daervooren ontfaende twaelf penn par voor zynen salaris
Ende van den brievekins van beteringhen die de voorseide loyers wysen zullen ter cause van vullaige daerof zal den voorseiden clerc maer hebben van den ghonen die brievekins begheeren zullen ende ontfaen voor zynen loon ende sallaris zes penn par
Wert voort ghehouden te zyne ten loyhuuse ter huere ghecostumeert om 't loyhuus open te doene ende dat te sluutene zoo 't ghecostumeert es up indien hy dies in ghebreke bevonden zy te verbueren ghelycke boete als de loyers te calengierene by looters ende t'hueren proffyte behoudens redelicke excuse die hy ghehouden wert te doene den voornoemden looters
Wert ooc ghehouden den bouck ende registre vander boeten ende beteringhen te sluutene in de scapraeden metten tanghen ende het loodt te weghene ende tellene de ghebreken daerinne bevonden te kennen te ghevene
Voort inschelicx wert ghehouden t' ontfaene de ghereede penninghen commende uuten boeten ende beteringhen ghewesen ter voorseide pertse ende de ghone die in ghebreke werden van de zelve boeten ofte beteringhen up te legghene wert ghehouden die persoonen naer dat zy eerst vermaent werden by den drapier t'hueren huuse ende domicilie te vermanene om de voorseide betaelinghe te doene ende hemlieden by den messagier huer werck te doen verbiedene
Ende midsdesen zal den voorseiden clerc hebben t'zynen proffyte den vierden penninck van den boeten aldaer ghewesen ende upgheleyt van twintich scell par ende van daerby nederwaert
Ende hebben belooft ende beloven by desen presente letteren uuter name van der voorseide stede den voornoemden Lucas Bonnet van den zelven officie paysivelic te laten ghebruucken ende useren zyn leven lanc gheduerende zonder hem eenich belet of inghebruuck daerin te doene ofte laten doene in eenegher mannieren Ende naer 't overlyden van den zelven Lucas zo zal 't zelve officie wederomme commen ende vallen in der stede handen
</main>
<end>
In oircondscepe van den welcken zo hebben wy dese presente letteren ghedaen zeghelen metten zeghele van zaeken van der voorseide stede van Ypre den achtiensten in octobre xve ende dertich
</end>