Compilatiecorpus Historisch Nederlands 1.0 (CHN): ambtelijke teksten 1250-1800: ieper_1548_1

<begin>
In nomine Domini Amen
</begin>
<main>
Uute dien reden bewyst ende recht begheert dat men de waerheit certifiert zonderlinghe als men dies verzocht es zoo eist dat in 't jaer ons Heeren duust vyf hondert ende achtenviertich more scribendi gallicano ter zevenster indictie 's donderdaechs den derden january 't Paeuscips ons alderhelichste vadere in Gode Paeus Paulus van dier name den derden in 't vichtienste jaer gheconstitueert voor my notaris ende ghetuughen onderscreven meester Willem van Huele wesende ten pensioene van der stede van Ypre over de zelve stede van Ypre ter verificatie van zeker intendit my gheexhibeirt produceirde by voorme van tourbe de subsequente persoonen te wetene Jacques du Gue oudt LXXIIIJ jaren meester Gheeraerdt Frutier oudt XLIIIJ jaren Poertelmeeux Willems wylen bailliu van den Crommen Elste oudt LXXIJ jaren Jan Florizuene wylen bailliu van Voormizeele Zunnebeke ende Wambeke oudt LXXIIJ jaren Jan de Rivellez wylen bailliu van der zale ende casselrie van Ypre oudt LVIJ jaren Claeys van der Heide oudt LXIIJ jaren meester Jan van den Zwaerde oudt LIX jaren Franchois de Jonghe oudt LVIIJ jaren Joachim Uutendaele bailliu van Vleincambacht oudt LIIJ jaren Jacob Morissis wylen clereq in de greffe van Ypre oudt XLVJ jaren Jooris van Houcke oudt LVJ jaren al inwoonende poorters t'Ypre ende Clement de Schildere bailliu van Elverdinghe Vlamertinghe ende 't capitel van Ryssele woonende t'Elverdinghe oudt LVJ jaeren de welcke eendrachtelic by sollempneelen eede deposeirden dat Myneheeren voochd ende scepenen van der stede van Ypre kennesse judicature ende berecht hebben van alle huere poorters poorterssen ende poorterlicke sterfhuuzen waer die woonachtich ofte gheleghen zyn 't zy binne ofte buuten der voornomde stede binden lande van Vlaendren ofte daer buuten in d'eerste instancie om actie personeele ende om raeuwe ende civile zaken zo dat de zelve voor gheen andere jugen betreckelic noch convenierlic en zyn in d'eerste instancie dan voor de voornoemde Myneheeren voochd ende scepenen huere jugen ordinare van raeuwe ende civille zaken wesende de zelve uutwoonende poorters ofte poorterssen ghehouden ende ghecostumeirt domicillie te kiesene nemene ende hebbene binder voorseide stede ofte scependomme Zo werden de zelve ten verzoucke van huere creditueren ofte claghende partie ontbooden t'hueren persoone ofte woonste by eenen messagier der voornoemde stede ofte by bescrivene by beslote lettren van de voornoemde Myneheeren die in possessie zyn de kennesse t' hebbene van de zelve huere poorters poorterssen ende poorterlicke sterfhuuzen waer die woonachtich ofte gheleghen zyn binder voornoemde stede ende scependomme ofte daer buuten van tyden inmemoriale ende daghelicx danof useiren ende tot noch gheuseirt hebben
In zulcker wys dat als 't gebuert es dat hemlieden danof ende daerinne belet ende empessement ghedaen gheweist es ende de voornoemde poorters poorterssen of poortelicke sterfhuuzen voor anderen jugen betrocken gheweist zyn hebben ter clachte van de zelve poorters ofte poorterssen 't zelve by justicien wederstaen zo dat zy de kennesse danof behouden hebben ende zyn danof ghebleven in goede duechdelicke possessie
Dat meer es de voornoemde poorters ende poorterssen zo wel by previlege expresse als by possessie inmemoriale zyn bevryt als dat zy noch huer goedt om raeuwe civille ende onbewetteghe zaken binder voorseide stede scependomme noch daerbuuten niet hechtelic noch arresteirlic zyn maer indien men hemlieden yet heesschen wille men es 't zelve sculdich te doene voor de voornomde Myneheeren voochdt ende scepenen huere jugen ordinare
Ende als 't ghebuert es dat de voornoemde poorters poorterssen ofte huer goedt zonder precedente condempnacie ende abandonnement ghearresteirt gheweist zyn hebben de voornoemde Myneheeren als t'huerer kennesse commen es ter clachte van de zelve poorters 't zelve wederstaen Zo dat de voornomde poorters poorterssen van de zelve previlege ende vriheide gheuseirt hebben daghelicx useren ende in possessie ende saisine zyn ten upziene van elcken
Van alle 't welcke de voornomde meester Willem van Huele in de qualiteit voorscreven heift van my notaris begheert een instrument ofte meer in behoorlicke voorme ghemaect t' hebbene
Aldus ghedaen t'Ypre in scepenhuus ende zevenentwintich camere der stede vau Ypre ten jare indictie maendt daghe ende Paeuscip alsboven Present meester Morant Sauvaige chirurgien ende Gheeraerdt Dierycx inwoonende poorters als ghetuughen ten desen gheroupen ende ghebeden
Ten jare ende daghe voorscreven Alaerdt Scoonjans bailliu van Zelebeke ende van mynheere den proost van Voormizeele in Voormizeele ligghende te bedde zieck van lichame hebbende nochtans goede memorie ende verstant oudt Liiia jaren deposeirt by eede de premissen boven in 't langhe ghenarreirt warachtich zynde daertoe adjousterende alsser onder zyne baillieuagen poorters van Ypre in d'eerste instancie omme actie personeele ende omme civille ende raeuwe zaken betrocken hebben gheweist dat hy als bailliu ten diveerschen stonden 't renvoy verzocht zynde ofte bescreven by Myneheeren voochd ende scepenen van Ypre van der kennesse ghescheeden es remitterende zulcken betrocken poorters voor de zelve Myneheeren voochd ende scepenen als huerlieder jugen ordinare Aldus ghedeposeirt t'Ypre ten woonhuuze van den deposant present den voornoemden Morant ende Gheeraerdt oorconden ten jare ende daghe voorscreven
Insghelycx den vierden january voorscreven compareirde voor my notaris ende ghetuughen onderscreven Jacob de Puudt poortere t'Ypere bailliu van Halebast ende Wytschate-ter-plaetse oudt LIJ jaren of daerontrent naer lecture van zeker intendit hem ghedaen inhoudende in substancie de narrative boven expresseirt attesteirt by eede de zelve warachtich zynde daertoe voughende dat zyne laten zoo wanneer zy verstaen dat huere sculdenaren poorters zyn van der stede van Ypre hemlieden verdraghen die te betreckene elders dan voor huerlieder poortwet
Van welche attestacie es van my notaires begheert gheweist een instrument ofte meer Aldus ghedaen up de halle t'Ypre ten jare ende daghe voorscreven present eerbare ende discrete meester Jan van den Zweerde ende Morant Sauvaige in-woonende poorters t'Ypre als ghetuughen ten dezen gheroupen ende ghebeden
</main>
<end>
</end>