Compilatiecorpus Historisch Nederlands 1.0 (CHN): ambtelijke teksten 1250-1800: ieper_1562_1

<begin>
</begin>
<main>
Rapport van heesche omme voocht ende scepenen der stede van Ypre alzo zy procederen heesschers ter eender zyde ende bailliu ende scepenen vanden casteele ten Walle metgaeders Jacques Nyenjaer Clais Nyenjaer ende andere hoyrs vanden sterfhuuse van wylent de huusvrouwe van Martin Claerboult respective verweerers ter andere
Alvooren es waerachtich dat zy heesschers ten goeden ende rechtveerdighen tytele hebben recht ende zyn jn duechdelicke possessie thebbene deerste kennesse berecht ende judicatuere vande sterfhuusen van hueren poorters ende poorterssen waer die ghestaen ofte gheleghen zyn binnen Vlaenderen ende die verdeelen ofte doen verdeelen volghende den poortwet ende kuergherechten der voorseyde stede
Item ende oick de quytscheldynghe vanden verdeelden goeden voor hemlieden te doen verkennen ende passeren met diesser meer ancleeft ende dependeert
Item ende zo wanneer eeneghe persoonen vremde ende gheene poorters zynde der voorseyde stede enich goet deelen jnde voorseyde steerfhuusen danof thebbene heffene ende ontfaene yssuwe dat es den rechten thienden penninck vander weerde vande goeden dat zulck vremde jnde voorseyde sterfhuusen zouden moghen anghedeelt wesen de baten proffyten ende emolumenten dan of commende theffene ende bestedene jn oirbore ende proffyte vande voorseyde stede
Item van welcken rechten ende possessien de supplianten gheuseert ghebruuckt ende ghepossesseert hebben over XX XXX XL L C jaeren ende van zo ouden tyden dat gheen memorie es ter contrarien
Item ende als men hemlieden daerinne heeft willen belet ofte obstacle doen hebben tzelve by justicien wederstaen ende gheobtineert diversche sentencien confirmatoire van dien zo dat zy ghebleven zyn inde voorseyde haerlieden rechten vryheden ende possessien
Item nu eyst ghebuert dat alzo onlancx deser weerelt overleden es de huusvrouwe van Martin Claerboultpoortersse der voorseyde stede van Ypre onder de heerlichede ende tenement van den casteele ten Walle ende dat huere hoirs waeren vremde ende gheene porters van Ypre
Item ende dat bailliu ende scepenen van den voorseyden casteele in meeninghe waeren kennesse te nemen van den selven haeren steerfhuuse so hebben de heesschers danof gheadverteert wesende by twee distincte haerlieden briefven ghesonden an den voornoemden bailliu ende scepenen verzocht dat zy hemlieden wilden verdraghen kennesse te nemene van den voorseyden steerfhuuse met diesser ancleeft ende dependeert ende die te latene de heesschers als wesende poorterlicke sterfhuys volghende den voorseyden haerlieden rechten ende possessien
Item ende hoewel zy tzelve wel behoirden ghedaen thebbene hemlieden verdreghen eeneghe kennesse ofte berecht te nemen van den voorseyden poorterlicken sterfhuusen
Item dien niet jeghenstaende ter kennesse van de heesschers es ghecommen als dat de voornoemde baliu ende scepenen van den voorseyden casteele ten Walle ghestelt hebben zeker deellieden ten voorseyden steerfhuuse in meeninghe hemlieden de kennesse van dien tasscriberene ende danof te priverene de voornoemde heesschers grootelick thaerlieden prejuditie ende in verminderthede van de voorseyde rechten vryheden ende possessien der voorseyde stede van Ypre
Midswelcken zyn clachtich ghevallen hier int hof ende hebben vercreghen commissie pertinente ende ten daghe dienende apud acla ghenomen de naervolghende conclusien
Met goeden causen etc zullen de verweerers elc alzo verre alst hem angaen mach ghecondempneerd zyn hemlieden te verdraghene eeneghe kennesse berecht ofte judicature te nemene van den sterfhuuse breedere in sheesschers impetratie verclaerst als wezende een poorterlick sterfhuys der stede van Ypre wederroupende te nyenten doende ende latende varen tstellen van deelslieden by hemlieden ghepresumeert te doene metgaders al tghone das zy meer zouden gedaen hebben angaende den sterfhuyse in questien ende hemlieden te verdraghene meer van ghelycken te doene latende danof de kennesse berecht ende judicature dezen heesschers ofte up al uuterlicke preuve ende costen schaden ende interesten
</main>
<end>
Actum den XXVIIIen aprilis XVe LXII P RYCKE doude
</end>