Compilatiecorpus Historisch Nederlands 1.0 (CHN): ambtelijke teksten 1250-1800: ieper_1610_1

<begin>
</begin>
<main>
Alvoren dat niemant vande procureurs voor hemlieden postulerenne hem en sal vervoorderen voor eenighe partyen te presenteren sonder expres last vanden ghenen voor den weleken hy hem presenteren wil wettelick ghepasseert ofte hem doenne stablisseren apud acte Ende hem presenterenne sonder eenich last tselve te doen advoueren ende ratifieren binnen XIIIJ daghen daernaer in vierschaere ende aght daghen in camere up peyne van radiacie ende boven doncosten ten dien opsiene gheschiet gheene ghesonderheit te betalen ten profyte vande tafele de somme van twee ponden parrisis die sylen ghehouden werden terstont te betalen
Item dat een yeghelyck van henlieden schuldich ende ghehouden wert alle processen ende differenten gheconcludeirt in reghte oft in tadvys van myn voornoemde heeren de selve behoorlyck te furnieren binnen XIIIJ daghen daernaer op peyne van insghelyck te boeten ende te betaelen voor elck van diere ten proffyte als voren de somme van twee ponden parrisis
Item dat sylen furnierende eenighe processen ghehouden worden met de selve over te legghen dextraicten van zulcke articlen der keuren deser casselrye danof sy henlieden by huerlieder respective ghediende vanteren behoorlyck by eenighe vande greffiers gheauthentiqueert op peyne van over elck extraict defaillant bevonden by henlieden te boeten ende te betalen de somme van dertigh schel parrisis
Item dat sylen oock schuldigh werden met de voorseide processen te furnieren huerlieder procuratie tsy wettelyck voor andere magistraten op huerlieder namen ghepasseert ofte extraict van huerlieder constitutie ad lites apud acta behoorlyck gheauthentiqueert als voren op peyne van by henlieden te boeten ende te betalen boven tinterest van partye ghelycke somme van twee ponden parrisis
Item dat boven dien elck van henlieden ghehouden wort tfurnissement van synen weghe tonderteekenne al eer tselve in camere sal ghebroght worden om te termineren op de boete van twee ponden parrisis als voren
Ten laetsten dat gheen van henlieden hem en sal vervoorderen te dienen ende ten buffette over te legghen tsy in vierschaere ofte in camere eenighe schrifturen als andere replique duplique en in saken excederenne de somme van tsestigh ponden parrisis eens ten sy de selve onderteeckent sy by eenich reghtsgheleerde op peyne van te boeten ghelycke twee ponden parrisis
</main>
<end>
Gepubliceert in camere den xi November 1610
</end>