Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1372_1

<begin>
Wij proefste scepenen ende raet van der stede van Curtrike doen te wetene allen lieden
</begin>
<main>
dat als ghescil was tusschen onsen lieven ende gheduchten heere ende prince onsen heere den grave van Vlaenderen an d'eene side ende ons in de name van der stede van Curtrike an d'andre side om d'berecht van eenen twiste ende faiten van eenen Goesin Pottin de welke ligghende ghevaen in de vanghenisse te Curtricke twist up eenen andren dwelk fait onse voors gheduchte heere seide ende maintenerde dat sire heerlicheit toebehoorde ende heerlike sculdich ware te berechtene ende wij seide ende maintenerde dat ons toebehoorde te berechtene naer de vriheit van der stede ende onse voors gheduchte heere t'onser nerenste supplicatie ende vervolghe ende nut gratie gheconsenteert heift den voors Goesin te doene ontslane ende te leverene deser waerft uter vanghenesse up sine voete
Wij hebben gheconsenteert ende kennen bi desen lettren in de name van der stede voers dat dit ghene prejudicie draghen sal noch mach onsen voers gheduchten heere noch sine naercommers an sinen rechte ende heerlicheit ende dergelike ons noch der stede van Curtrike in onse vriheit ende dat onse voers gheduchten heere up ons noch wij up hem hiermede gheen niewe recht ghecreghen hebben maer dat hi ende wij sullen blive staende hierof in alsulcken pointe ende rechte deen jeghen den andren als wij stonden eer dit fait gheviel
</main>
<end>
In orconscepen van wareden hebben wij proefste scepenen ende raet van der stede erin ghenoemt dese presente lettren bezeghelt met den grote seghele van der voors stede van Curtrike utehanghende Ghemaect ende ghegheven in 't jaer van gratien als men screeft dusentich drie honderd twee ende seventich den twindische dach in December
</end>